“Fitch” Oʻzbekiston reytingini oshirdi: Xususan xususiylashtirish va davlat korxonalari sohasidagi islohotlar eʼtirof etildi
2025-06-30 21:40:00 / Yangiliklar
“Fitch Ratings” agentligi tomonidan 2025 yil 26 iyunda eʼlon qilingan hisobotga koʻra, Oʻzbekistonning suveren kredit reytingi “BB-” dan “BB” darajasiga oshirildi va barqaror darajada tasdiqlandi.
Mazkur reytingning oshirilishi mamlakatimizdagi olib borilayotgan keng koʻlamli iqtisodiy islohotlar, jumladan makroiqtisodiy barqarorlik, byudjet intizomini mustahkamlash, davlat korxonalarini boshqaruvi sohasidagi islohotlar va xususiylashtirish borasida erishilayotgan natijalarni eʼtirof etadi.
Xususan, “Fitch Ratings” hisobotida quyidagilar taʼkidlangan:
- Davlat sektoridagi islohotlar
“Davlat ishtirokidagi korxonalarni isloh qilish yangi bosqichga olib chiqildi, ular soni yanada qisqartirildi, shuningdek 2024-yil 24-avgustda davlat ishtirokidagi 18 ta korxona ustav fondidagi davlat ulushi Milliy investitsiya fondiga oʻtkazildi.”
- Korporativ boshqaruvni mustahkamlash
“yirik korxonalarning moliyaviy mustaqilligini oshirish va ularning korporativ boshqaruvini takomillashtirish maqsadida, oʻtgan yilda ularning ayrimlari qayta tashkil etildi hamda tarkibiy oʻzgarishlar amalga oshirildi.”
Xalqaro “Fitch” agentligi tomonidan berilgan baholar Oʻzbekiston Respublikasi Prezidenti Sh.M.Mirziyoyev rahbarliklarida iqtisodiyotning barcha jabhalarda amalga oshirilayotgan izchil va samarali islohotlar, jumladan xususiylashtirish va davlat aktivlarini boshqarish sohasidagi oʻzgarishlar samaradorligiga xalqaro ishonchni tobora mustahkamlab borayotganini namoyon etmoqda.
Maʼlumot uchun: 2021–2024-yillar va 2025-yilning oʻtgan davrida 7 781 ta davlat ishtirokidagi korxonalar aktivlari (7 175 ta koʻchmas mulk va 606 ta ulush/aksiya) 45,5 trln soʻmga sotilgan. 2025-yil uchun tasdiqlangan xususiylashtirish dasturlariga (PF-70, PQ-145) asosan, 115 ta xoʻjalik jamiyatlaridagi davlat ulushi, 659 ta koʻchmas mulk xususiylashtirish va 29 ta yirik korxonalar xalqaro bozorlarda sotilishi, shuningdek, 12 ta yirik korxona aksiyalari IPO va SPO orqali fond bozorlariga chiqarilishi rejalashtirilgan.