Ichki ishlar vazirligi, Raqamli texnologiyalar vazirligi, “Kiberxavfsizlik markazi” DUK va boshqa mutasaddi tashkilotlar bilan joylarda targ‘ibot ishlari olib borildi.
2024-07-23 12:30:00 / Anons
O‘zbekiston Respublikasi Prezidentining 2024 yil 21 fevraldagi PF-37-son Farmoni 4-ilovasi bilan tasdiqlangan Rejaning 30-bandiga asosan, joriy yilning iyul oyida respublika miqyosida jamiyatning har bir sohasida “Kibermadaniyatni yuksaltirish oyligi” doirasida Ichki ishlar vazirligi, Raqamli texnologiyalar vazirligi, “Kiberxavfsizlik markazi” DUK va boshqa mutasaddi tashkilotlar bilan joylarda targ‘ibot ishlari olib borildi.
Xususan, joriy yilning 2-11 iyul kunlari Raqamli texnologiyalar vazirligi mutaxassislari tomonidan Xorazm viloyatiga xizmat safari tashkil qilinib, vazirlik tizimidagi tashkilotlarda, shuningdek Vazirlikka biriktirilgan “Ko‘hna qal’a” MFYda Ichki ishlar vazirligi Tezkor qidiruv departamenti Kiberxavfsizlik markazi, “Infinbank” AJ Xorazm filiali mas’ullari ishtirokida ishchi-xodimlar hamda aholi o‘rtasida kibermadaniyatni oshirish yo‘nalishida davra suhbatlari tashkillashtirildi.
Ushbu davra suhbatlari davomida mutaxassislar tomonidan Internet tarmog‘i orqali tarqalayotgan firibgarliklar, ularning kelib chiqish sabablari va mazkur firibgarlikka fuqarolar aldanib qolmasligi bo‘yicha qanday choralar ko‘rishi lozimligi to‘g‘risida tushuntirishlar berib o‘tildi.
Shu bilan birgalikda, mazkur oylikda Vazirlikning Xorazm viloyat hududiy boshqarmasi tomonidan maxsus flayer tayyorlanib, viloyatdagi mavjud uyali aloqa operatorlari savdo ofislariga tarqatildi.