“IT Park Ventures” istiqbolli startaplar uchun arizalar qabul qilmoqda
2025-02-10 11:50:00 / Vazirlik yangiliklari
O‘zbekiston Prezidenti 2024-yil 14-oktabrdagi O‘zbekistonda startup va venchur moliyashtirish ekotizimlarini rivojlantirishga qaratilgan 357-sonli qarorida “Raqamli startaplar dasturi”ni tasdiqladi. Ushbu dastur doirasida 2024-yil 7-dekabrda startaplarni qo‘llab-quvvatlashning asosiy vositasi va O‘zbekistonni mintaqadagi yetakchi startap-xablardan biriga aylantirish yo‘lidagi muhim qadam bo‘lgan “IT Park Ventures” venchur fondi ishga tushirildi.
“IT Park Ventures” bir qator istiqbolli yo‘nalishlarda startaplarni qo‘llab-quvvatlaydi, jumladan:
• Sun’iy intellekt va machine learning(AI/ML)
• Yashil texnologiyalar (GreenTech)
• Ta’lim texnologiyalari (EdTech)
• Moliyaviy texnologiyalar (FinTech)
• O‘yinlarni ishlab chiqish (GameDev) va boshqa innovatsion sohalarda amalga oshiriladi.
Investitsiyalarning o‘rtacha miqdori taxminan 150 ming AQSh dollarni tashkil etadi, bunda investitsiyalar diapazoni quyidagicha o‘zgaradi:
• G‘oya bosqichi: 10 ming dollardan 30 ming dollargacha.
• MVP bosqichi: 50 ming dollardan 150 ming dollargacha.
• O‘sish bosqichi: 150 ming dollardan 300 ming dollargacha.
• Round “A”: 500 ming dollardan 1 million dollargacha (fondning portfolio startaplari uchun).
Bundan tashqari, PQ-357-son qarori doirasida moliyalashtirishning qo‘shimcha mexanizmlari – 100 ming dollargacha bo‘lgan investitsiyalar (kapitali 50 million dollardan yuqori bo‘lgan xalqaro venchur fondlaridan investitsiyalarni jalb qilgan startaplar uchun) va 300 million so‘mgacha kreditlar ko‘zda tutilgan bo‘lib, ular jamg‘arma doirasida joriy etiladi. Ushbu chora-tadbirlar barqaror startap ekotizimini yaratish va o‘zbekistonlik startaplarning jahon maydonidagi raqobatbardoshligini oshirishga qaratilgan.
Agar startapingiz rivojlanishning keyingi bosqichiga tayyor bo‘lsa va siz nafaqat sarmoya, balki strategik hamkorni ham qidirayotgan bo‘lsangiz, https://itparkventures.uz/ saytida ariza bering.
Birgalikdagi sa’y-harakatlar bilan innovatsiyalar haqiqiy taraqqiyotga olib boradigan kelajakni barpo etamiz.