O‘zbekiston Respublikasi Raqamli texnologiyalar vazirligi

Raqamli texnologiyalar vaziri Sh.Shermatov Xorazm viloyatida faoliyat yuritayotgan IT Park rezident kompaniyalari vakillari bilan uchrashib, ularning faoliyati bilan tanishdi.

U yerda IT sohasida faoliyat olib borayotgan kompaniyalarning ish jarayonlari, mavjud infratuzilma, kadrlar salohiyati hamda kompaniyalar duch kelayotgan muammolarni o‘rganib, mavjud muammolarni hal etish hamda IT kompaniyalar faoliyatini yanada rivojlantirish masalalari bo‘yicha taklif va tavsiyalar berildi.

Uchrashuv davomida kompaniyalar o‘z loyihalari, ishga tushirilgan servislar, eksport salohiyatiga ega bo‘lgan xizmatlar hamda yosh mutaxassislarni tayyorlash borasidagi tashabbuslarni Vazirga taqdimot qildilar.

Shuningdek, IT Park rezidentlariga yaratilgan imkoniyatlar, soliq imtiyozlari va davlat tomonidan ko‘rsatilayotgan qo‘llab-quvvatlash mexanizmlari yuzasidan fikr almashildi.

Vazir hududiy IT ekotizimini kuchaytirish, raqamli xizmatlar eksportini kengaytirish hamda IT sohasiga yoshlarni keng jalb etish zarurligini ta’kidladi. IT kompaniyalar vakillari bilan uchrashuv davomida vazir tomonidan kompaniyalar faoliyatini yanada qo‘llab-quvvatlash bo‘yicha bir qator topshiriqlar berildi.