O‘zbekiston Respublikasi Oliy taʼlim, fan va innovatsiyalar vazirligi

Delegatsiya aʼzolari xalqaro talabalar uchun yaratilgan shart-sharoitlar, grant dasturlari, ilmiy markazlar hamda zamonaviy laboratoriyalarni koʻzdan kechirdilar. Taʼlim muassasalaridagi zamonaviy infratuzilma, innovatsion yondashuvlar, taʼlim va ilmiy izlanishlar uchun yaratilgan imkoniyatlar yuqori baholandi.

Shuningdek, talabalarning darsdan tashqari faoliyatlari – madaniy, ijodiy va sport tadbirlarida faol ishtirok etishlari uchun yaratilgan sharoitlar ham alohida eʼtirof etildi.

Tanishish davomida “Biznes uchun ilm” (Science4Business) loyihasiga ham eʼtibor qaratildi. Loyiha Lodz texnologiyalar universiteti va Lodz meditsina universiteti hamkorligida amalga oshirilmoqda. Uning maqsadi ilm-fan yutuqlarini ishlab chiqarish jarayonlariga joriy etish va tadqiqot natijalarini amaliyotga tatbiq etishdan iborat.

Kino va televideniye milliy oliygohida bugungi kunda 700 nafardan ziyod talabalar tahsil olmoqda, ular orasida xorijiy talabalar ham koʻpchilikni tashkil etadi. Ushbu taʼlim muassasasi talabalari har yili nufuzli xalqaro festival va tanlovlarda muvaffaqiyatli ishtirok etib, taʼlim sifati va ijodiy imkoniyatlarning yuqori darajada ekanini namoyon etib kelishmoqda.

Forum doirasida Samarqand davlat tibbiyot universiteti, Oʻzbekiston jurnalistika va ommaviy kommunikatsiyalar universiteti hamda Qarshi davlat universiteti oʻz taqdimotlari bilan ishtirok etdilar. Uchrashuvlar davomida ikki tomonlama hamkorlikni yanada rivojlantirish, talabalar va professor-oʻqituvchilar almashinuvi, qoʻshma ilmiy loyihalarni amalga oshirish yuzasidan muzokaralar olib borildi.

Tashrifning yakunlovchi qismida Oʻzbekiston delegatsiyasi Lodz shahrining boy tarixi, madaniy merosi va oʻziga xos arxitektura inshootlari bilan tanishdi. Mehmonlarda shaharning tarixiy muhiti va zamonaviy rivojlanish surʼati katta taassurot qoldirdi