G.V. Plexanov nomidagi Rossiya iqtisodiyot universiteti Toshkent shahridagi filiali tashkil topganiga 30 yil toʻldi
2025-04-29 10:00:00 / Vazirlik yangiliklari
Tantanali tadbirda Oʻzbekiston Respulikasi Oliy taʼlim, fan va innovatsiyalar vaziri Qoʻngʻirotboy Sharipov, Rossiya Federatsiyasi Fan va oliy taʼlim vaziri oʻrinbosari Konstantin Mogilevskiy, Toshkent shahridagi G.V. Plexanov nomidagi Rossiya iqtisodiyot universiteti filiali direktori, akademik Qalandar Abdurahmonov soʻzga chiqdilar.
"Mazkur oliygoh Oʻzbekistonda oʻz eshiklarini ochgan ilk xorijiy universitet boʻlib, hozirda filial mamlakatimizdagi yetakchi taʼlim va ilmiy markazlardan biriga aylandi, — dedi tabrik soʻzida vazir Q.Sharipov. – Yubiley kunlarining eng muhim voqealaridan biri esa oliygohda sunʼiy intellekt sohasidagi Ilgʻor muhandislik maktabining ochilishidir".
Oʻtgan 30 yil mobaynida filial raqobatbardosh mutaxassislarni tayyorlash uchun mustahkam platformaga alanib, minglab yuqori malakali mutaxassislar yetishib chiqdi, ular iqtisodiyotning turli sohalari va tadbirkorlik rivojiga munosib hissa qoʻshmoqda.
2025-yil 29–30-aprel kunlari filial yubileyt doirasida qator muhim tadbirlar tashkil etiladi. Jumladan, “Iqtisodiyotda sunʼiy intellekt: bank-moliya sohasi tahlili” mavzusida davra suhbati, shuningdek, “IKT sohasida yosh mutaxassislar uchun raqamli koʻnikma va kompetensiyalar shakllantirish” mavzusida mahorat darslari oʻtkazilishi rejalashtirilgan.
Bundan tashqari, “Raqamli iqtisodiyotning global ekotizimlari: taʼlimdagi yangi trendlar va zamonaviy chaqiriqlar” mavzusida ilmiy konferensiya boʻlib oʻtadi. «Raqamli muhit» loyihasi doirasida taʼlim auditoriyalari va markazlar taqdimoti oʻtkaziladi, bunda sanoat hamkorlari ham faol ishtirok etadi.
Filial olimlarining ilmiy yutuqlari va yaqinda chop etilgan nashrlar koʻrgazmasi, shuningdek, “Birja-ekspert” va “Iqtisodiyot va muhandislik” kabi ilmiy-ommabop jurnallarning maxsus nashrlari taqdimoti tashkil etiladi. Ularda yetakchi olimlar, tizim rahbarlari, ish beruvchilar va mashhur bitiruvchilarning maqolalari chop etilgan.
Shuningdek, REU#COWORKING inkubatsiya markazi startap loyihalari, GreenEcoHuB yashil iqtisodiyot laboratoriyasi, Huawei AKT akademiyasi loyihalari hamda fakultetlar va ilmiy tanlovlar gʻoliblarining yutuqlari namoyish etiladi.
Yubiley kunlari sohaning yetakchi ekspertlari maʼruzalari, rahbar lavozimlarida muvaffaqiyatli faoliyat yuritayotgan bitiruvchilar bilan uchrashuvlar, shaxmat musobaqalari, yoshlar tashabbuslari doirasida “REU yetakchilari” va “Yevroosiyo yetakchilari” loyihasi interaktiv tadbirlari oʻtkaziladi. Xotin-qizlar jamiyati va Qizlar yetakchilari kengashi tomonidan ham bir qator tadbirlar tashkil etilishi koʻzda tutilgan.