O‘zbekiston Respublikasi Oliy taʼlim, fan va innovatsiyalar vazirligi

Mazkur yigʻilish Prezidentimiz Shavkat Mirziyoyev tomonidan Xorazm viloyatiga tashrifi chogʻida ilgari surilgan ustuvor vazifalar ijrosini taʼminlash doirasida tashkil etildi. Davlatimiz rahbari Xorazm viloyatini ijtimoiy-iqtisodiy rivojlantirish boʻyicha oʻtkazgan yigʻilishda oliy va kasbiy taʼlim sohasini isloh qilish, kadrlar tayyorlashda zamonaviy va amaliy yondashuvlarni joriy etish, xalqaro standartlarga mos taʼlim dasturlarini kengaytirish yuzasidan muhim topshiriqlar bergan edi.

Yigʻilishda aynan shu masalalarga alohida eʼtibor qaratildi. Jumladan, taʼlim tizimining mintaqaviy rivojlanishdagi oʻrni, yoshlarning kasbiy tayyorgarligini kuchaytirish, mehnat bozorining real ehtiyojlariga mos kadrlar tayyorlash, dual taʼlimni keng joriy etish, amaliy mashgʻulotlar ulushini oshirish, xorijiy tillarni chuqur oʻrgatishga yoʻnaltirilgan maxsus guruhlar tashkil etish kabi  ustuvor yo‘nalishlar tanqidiy tahlil qilinib, muhokama qilindi.

Xususan, Prezident topshirigʻiga muvofiq, Xiva turizm texnikumida yiliga kamida 100 nafar gid va servis xodimini xitoy, arab, yapon, ispan kabi talab yuqori boʻlgan xorijiy tillarga oʻqitish boʻyicha amaliy chora-tadbirlar belgilab olindi.

Shuningdek, vazir Q. Sharipov viloyatdagi oliy taʼlim muassasalarida ilmiy-tadqiqot ishlarini Xorazm viloyatining ijtimoiy-iqtisodiy rivojlanish strategiyasiga muvofiq holda yoʻnaltirish, ilm-fanni amaliyot bilan integratsiya qilish, xorijiy investorlarni jalb etish va xalqaro hamkorlikni kengaytirish zarurligini taʼkidladi.

Vazir tomonidan taʼlim muassasalarida tizimli yondashuvni kuchaytirish, ilgʻor xorijiy tajribalarni oʻrganib, ularni mahalliy sharoitga moslashtirish boʻyicha aniq topshiriqlar berildi.