Oʻzbekiston vazirlari Budapeshtda talabalar bilan uchrashdi
2025-05-19 20:00:00 / Vazirlik yangiliklari
Uchrashuv samimiy va ochiq muloqot ruhida oʻtdi. Talabalarga Oʻzbekistonda oliy taʼlim sohasida amalga oshirilayotgan islohotlar, xalqaro hamkorlik dasturlari, xorijda tahsil olayotgan yoshlar uchun yaratilayotgan imkoniyatlar, qaytib kelib mehnat faoliyatini boshlashdagi koʻmak mexanizmlari haqida atroflicha maʼlumotlar berildi.
Qoʻngʻirotboy Sharipov talabalarning oʻqish sharoitlari, taʼlim jarayonida duch kelayotgan qiyinchiliklari, amaliy mashgʻulot va stajirovkalarda qatnashishi, shuningdek, ularning Vengriya taʼlim tizimi haqidagi shaxsiy taassurotlarini tingladi. Talabalarning loyihalari va ilmiy-tadqiqot ishlari bilan qiziqib, ularni Oʻzbekistondagi sohaviy islohotlar jarayonida faol ishtirok etishga chorladi.
Ozodbek Nazarbekov esa madaniy sohadagi oʻzgarishlar, madaniy diplomatiyada yosh kadrlarning oʻrni va kelgusidagi loyihalar haqida soʻzlab, talabalarni milliy qadriyatlarni targʻib qilishda faol boʻlishga chorladi.
Talabalar oʻzlari uchun muhim boʻlgan bir qator masalalarni koʻtardilar. Uchrashuvda ularning fikr-mulohazalari, taklif va tashabbuslari tinglandi. Muloqot davomida talabalar davlatimizning yoshlarga boʻlgan eʼtiborini yana bir bor his etdilar. Uchrashuv xorijda tahsil olayotgan yoshlarning Vatan bilan muloqotini mustahkamlash, ularni mamlakat taraqqiyotiga daxldorlik tuygʻusi bilan yashashga xizmat qiladi.