O‘zbekiston Respublikasi Oliy taʼlim, fan va innovatsiyalar vazirligi

Tadbirda O‘zbekiston Respublikasi Oliy ta’lim, fan va innovatsiyalar vaziri o‘rinbosari Otabek Mahkamov, Shensi va Tsinxay viloyatlarining ta’lim departamentlari rahbarlari, shuningdek, O‘zbekiston va Xitoyning 20 dan ortiq yetakchi oliy ta’lim muassasalari, ilmiy markazlari va ta’lim siyosatini shakllantiruvchi tashkilotlar vakillari ishtirok etdilar.

Sessiya davomida xitoy tilini o‘qitish bo‘yicha o‘zbek–xitoy hamkorligi tajribalari, “xitoy tili + kasbiy ko‘nikma” modeli asosida kadrlar tayyorlash masalalari, O‘zbekiston oliy ta’lim muassasalarida xitoy tilining o‘rni va rivojlanish istiqbollari, xorijiy tillarni o‘qitishda zamonaviy pedagogik yondashuvlar, raqamli davrda til o‘rgatishning yangi konsepsiyalari, shuningdek madaniy diplomatiya va tillararo muloqotni rivojlantirish kabi masalalar muhokama qilindi.

Sessiya yakunida tomonlar xitoy tilini o‘qitish sifatini oshirish, xitoyshunos kadrlar tayyorlash, madaniy almashinuvni kengaytirish va ilmiy hamkorlikni chuqurlashtirishga oid qator kelishuvlarga erishdilar.

Xususan, Farg‘ona davlat universiteti va Sian xorijiy tillar universiteti o‘rtasida O‘zbekiston–Xitoy madaniy almashinuv markazini tashkil etish bo‘yicha memorandum imzolandi. Mazkur markaz ikki mamlakat o‘rtasidagi madaniy, ilmiy va ta’limiy aloqalarni mustahkamlashda muhim platforma bo‘lib xizmat qilishi kutilmoqda.