O‘zbekiston Respublikasi Oliy taʼlim, fan va innovatsiyalar vazirligi

Unda Oliy ta’lim, fan va innovatsiyalar vaziri Qo‘ng‘irotboy Sharipov, tuman hokimi Anvar Sayfutdinov hamda bir qator oliy ta’lim muassasalari rahbarlari, tegishli tashkilot va idoralar vakillari ishtirok etdi.

Yig‘ilishda Prezident tashabbusi bilan amalga oshirilayotgan “Dolzarb 90 kun” loyihasi doirasida o‘quvchi va yoshlarning bo‘sh vaqtini mazmunli tashkil etish, ularning qiziqishlarini rivojlantirishga xizmat qiladigan faoliyat turlarini kengaytirish masalalari muhokama qilindi.

Vazir Qo‘ng‘irotboy Sharipov yozgi ta’til — bu bolalar uchun nafaqat dam olish, balki o‘zini rivojlantirishga xizmat qiladigan muhim davr ekanini ta’kidlab, sport, ijod, axborot texnologiyalari va chet tillar yo‘nalishlarida keng imkoniyatlar yaratish zarurligini bildirdi.

Hozirda tumandagi 6 ta maktabda yozgi oromgohlar faoliyat yuritmoqda, 12 ta maktabda esa sport va sog‘lomlashtirish mashg‘ulotlari yo‘lga qo‘yilgan. Yaqin kunlarda quyidagi yo‘nalishlar ham boshlanishi rejalashtirilgan:

• IT kurslari (dasturlash va robototexnika),
• Chet tillari (Jahon tillari universiteti o‘qituvchilari bilan),
• Tadbirkorlik, ijodiy ustaxonalar va hunarmandchilik (startaplar, oshpazlik, qo‘lda ishlash san’ati).

Mazkur jarayonlarga oliy ta’lim muassasalari, texnikumlar, maktab o‘qituvchilari va iqtidorli talabalar jalb etilishi ko‘zda tutilgan.

Yozgi dam olish dasturi tumandagi 18 ta maktabni qamrab oladi va 3 mingdan ortiq bolalarni o‘z ichiga oladi. Tashkil etilayotgan faoliyatlar bolalarning bo‘sh vaqtini mazmunli, foydali va qiziqarli o‘tkazishga xizmat qiladi.

Yig‘ilishdan so‘ng mutasaddilar 60-maktabga tashrif buyurib, oromgohlar faoliyati va mavjud sharoitlar bilan tanishdilar.