Chunsin shahrida O‘zbekiston–Xitoy kasbiy ta’lim forumi bo‘lib o‘tmoqda
2025-06-14 17:20:00 / Vazirlik yangiliklari
O‘zbekiston Respublikasi Oliy taʼlim, fan va innovatsiyalar vazirligi va Xitoy Taʼlim vazirligi hamda Chunsin shahri rahbariyati hamkorligida tashkil etilgan mazkur anjumanda Oliy taʼlim, fan va innovatsiyalar vaziri o‘rinbosari Otabek Mahkamov boshchiligida O‘zbekistonning 23 nafar texnikum direktorlari, Samarqand va Farg‘ona viloyati hududiy boshqarmalari rahbarlari, shuningdek, Xitoyning 100 dan ortiq kollej direktorlari va yirik ishlab chiqarish kompaniyalari vakillari ishtirok etdi.
Forumda ishtirokchilar kasbiy ta’lim sohasidagi hamkorlik, xususan qayta tiklanuvchi energetika, sun’iy intellekt, transport, axborot xavfsizligi, tibbiyot va qishloq xo‘jaligi kabi yo‘nalishlarda o‘zaro tajriba almashish, Xitoy ta’lim dasturlarini O‘zbekiston texnikumlarida joriy etish hamda o‘qituvchilarning Xitoy kompaniyalarida amaliyot o‘tash imkoniyatlarini muhokama qildilar.
Tadbirning ochilishida so‘zga chiqqanlar O‘zbekiston–Xitoy munosabatlarining barcha sohalarda jadallik bilan rivojlanayotgani, ayniqsa Xitoy investorlari ishtirokidagi loyihalar doirasida mamlakatimiz mehnat bozorida ehtiyoj yuqori bo‘lgan malakali kadrlarni tayyorlash zarurati ortib borayotganini alohida ta’kidladilar.