Oʻzbekiston–Germaniya hamkorligida yangi bosqich: mamlakatimizda Germaniya universiteti tashkil etiladi
2025-06-20 20:20:00 / Vazirlik yangiliklari
Uchrashuvning markaziy mavzusi Oʻzbekistonda Germaniya universitetini tashkil etish masalasi boʻldi. Sarvarxon Buzrukxonov mazkur tashabbusni amalga oshirishda Anxalt amaliy fanlar universiteti tajribasi va salohiyati muhim oʻrin tutishi mumkinligini qayd etdi.
Tomonlar universitetlararo munosabatlarni kengaytirish, taʼlim va ilmiy tadqiqot sohalarida innovatsion yondashuvlarni joriy etish, shuningdek, talabalar va professor-oʻqituvchilar oʻrtasida akademik almashinuvni yoʻlga qoʻyish masalalarini atroflicha muhokama qildilar.
Safar doirasida Oʻzbekiston delegatsiyasi Anxalt amaliy fanlar universitetida yaratilgan sharoitlar, jumladan talabalar uchun qulay yotoqxonalar, zamonaviy oʻquv laboratoriyalari va ilgʻor texnologiyalar bilan jihozlangan oʻquv bazasi bilan yaqindan tanishdi.
Uchrashuv davomida Oʻzbekistonda Germaniya universitetini tashkil etishning dastlabki bosqichida bir necha muhim taʼlim yoʻnalishlari: elektrotexnika va kompyuter muhandisligi, yirik maʼlumotlar fani va sunʼiy intellekt (Data Science and AI), shuningdek, xalqaro biznes boʻyicha dasturlarni yoʻlga qoʻyish taklif etildi.
Bu tashabbus Oʻzbekistonda raqobatbardosh kadrlar tayyorlash, Yevropa standartlari asosida bilim berish va Germaniyaning ilgʻor akademik anʼanalarini joriy etish borasida muhim qadam boʻlishi kutilmoqda.