O‘zbekiston Respublikasi Oliy taʼlim, fan va innovatsiyalar vazirligi

Tadbir avvalida mehmonlar universitet faoliyati, keyingi yillarda amalga oshirilgan yangiliklar, infratuzilmaviy oʻzgarishlar va taʼlim sifatini oshirishga qaratilgan tashabbuslar boʻyicha taqdimotlar bilan tanishishdi.

Shundan soʻng tashkil etilgan tantanali tadbirda viloyat hokimi Adiz Boboyev SamDU jamoasining ilmiy va amaliy faoliyati, professor-oʻqituvchilarning izlanishlari, taʼlim-tarbiya jarayonlarini rivojlantirish borasidagi saʼy-harakatlarini alohida eʼtirof etdi. Shu bilan birga, u universitetning nufuzli xalqaro reytingda munosib oʻrin egallagani bilan professor-oʻqituvchilar va yoshlarni samimiy tabrikladi.

Vazir Qoʻngʻirotboy Sharipov ham SamDU jamoasiga oʻz tabrigi va tashakkurini izhor etdi. Ushbu natija Prezidentimiz tomonidan oliy taʼlim sifatini xalqaro mezonlar asosida oshirish, 2026-yilga qadar yurtimiz OTMlarini dunyodagi yetakchi 1000 ta universitet roʻyxatiga kiritish boʻyicha berilgan topshiriqlari ijrosi sari tashlangan yana bir muhim qadam ekanini qayd etdi.

Shuningdek, soʻzga chiqqanlar bu natija Samarqand davlat universitetining global taʼlim maydonidagi oʻrni mustahkamlanayotganini va uning xalqaro hamkorlik, ilmiy izlanish hamda taʼlim sifatini yanada yuqori bosqichga olib chiqish borasidagi intilishlar samara berayotganini taʼkidlashdi.

Maʼlumot oʻrnida, Samarqand davlat universiteti joriy yilda QS World University Rankings reytingining quyidagi muhim indikatorlar boʻyicha yuksak natijalarni qoʻlga kiritdi:

Professor-oʻqituvchilar va talabalar soni nisbati (Faculty Student Ratio): 494-oʻrin
Akademik obroʻ (Academic Reputation): 534-oʻrin
Xalqaro professor-oʻqituvchilar soni (International Faculty Ratio): 651-oʻrin
Ish beruvchilar orasidagi obroʻ (Employer Reputation): 701-oʻrin