O‘zbеkiston Rеspublikаsi Ichki ishlаr vаzirligi

Fargʻona viloyati Uchkoʻprik tumani Qurbonqashqar mahallasi Avazjon ota Sotvoldiyevlar xonadoniga IIV Qorovul qoʻshinlari harbiy xizmatchilari va keng jamoatchilik vakillari tashrif buyurib, qoʻshin safida namunali va halol xizmat faoliyati bilan koʻpchilikka oʻrnak boʻlib kelayotgan III-darajali serjant Azizjon Sotvoldiyevning ota-onasiga qoʻshin qoʻmondoni nomidan “Tashakkurnoma”ni tantanali tarzda topshirishdi.

Mehmonlar A.Sotvoldiyevning sohada korrupsion jinoyatni oldini olishda jonbozlik koʻrsatgani, qonunchilikka qatʼiy amal qilib, oʻz burchini vijdonan bajarayotgani uchun ota-onasini samimiy qutlab, yurt koriga yaraydigan farzand tarbiyalashgani uchun rahmatlar aytib oʻtishdi hamda pir piyola choy ustida maroqli suhbat qurishdi.

Albatta, mazkur tashakkurnoma harbiy xizmatchining yuksak vatanparvarligi, burchga sadoqati va intizomi uchun taqdim etilgan boʻlib, unda ota-onaning farzand tarbiyasidagi mehnati alohida eʼtirof etilganini taʼkidlash joizdir.

Oʻgʻlim Azizjon bolalikdan harbiy libosga havas qilib shu sohani tanladi, undagi mardlik va jasorat kabi xislatlar er yigitga xos, Otasi bilan shunday farzand tarbiyalaganimizdan faxrlanamiz – deydi, onasi Zamiraxon aya Sotiboldiyeva. Azizjon va uning safdoshlariga mashaqqatli kasblarida ulkan zafarlar tilayman, yurtimiz tinchligiga hech qachon koʻz tegmasin.

Albatta, bu kabi tashabbuslar vatan oldidagi burchini sidqidildan ado etayotgan harbiy xizmatchilarga yuksak ishonch va eʼtibor namunasi boʻlib qolmasdan, ularning ota-onalariga cheksiz faxr ifoda etishi bilan ahamiyatlidir.

IIV Qorovul qoʻshinlari qoʻmondonligi axborot guruhi