Buxoro davlat universitetida oʻtkazilgan “Rahbar va yoshlar” uchrashuvi talabalarning qator tashabbus va takliflari roʻyobiga xizmat qildi
2025-04-18 09:00:00 / Yangiliklar
Har qanday davlatning kelajagi maʼnan yetuk, jismonan sogʻlom va intellektual salohiyatli yoshlarga bogʻliq. Shu maʼnoda, yoshlarga boʻlgan eʼtibor – mamlakatning ertangi kuniga boʻlgan eʼtibordir. Buxoro davlat universitetida oʻtkazilgan “Rahbar va yoshlar” uchrashuvi aynan ana shunday ezgu maqsadlarga xizmat qildi.
2025-yil 8-mart kuni Ichki ishlar hamda Oliy taʼlim, fan va innovatsiyalarni rivojlantirish vazirliklari tomonidan qabul qilingan qoʻshma qarorga koʻra, barcha oliy taʼlim muassasalariga hududiy ichki ishlar organlari rahbarlari masʼul etib biriktirildi.
Shu asosda, Buxoro davlat universitetida yoshlarni vatanparvarlik ruhida tarbiyalash, huquqbuzarliklarning oldini olish va boʻsh vaqtlarini mazmunli tashkil etish boʻyicha amaliy ishlar olib borilmoqda.
Universitet rahbariyati, viloyat IIB, bosh imom va profilaktika inspektorlari ishtirokida ochiq muloqot oʻtkazilib, talaba-yoshlarga huquq va majburiyatlar, imkoniyatlar haqida tushuntirishlar berildi.
Shuningdek, huquqbuzarlik holatlari tahlil qilinib, ularning oldini olish boʻyicha aniq chora-tadbirlar belgilandi. Talabalar oʻz taklif va savollarini bildirishdi, mutasaddilar tomonidan batafsil javoblar qaytarildi. Ayrim masalalar yuzasidan esa universitet va masʼullarga topshiriqlar berildi.
Uchrashuv yoshlar bilan ochiq muloqotni taʼminlash, ularning muammolariga yechim topish va faolligini oshirishga xizmat qildi.
Buxoro viloyati IIB Axborot xizmati