Jizzax davlat pedagogika universitetida sportni rivojlantirish va sohada korrupsiyaga qarshi kurash masalalariga bagʻishlangan yigʻilish boʻlib oʻtdi
2025-04-18 09:00:00 / Yangiliklar
Jizzax davlat pedagogika universitetida sportni rivojlantirish va sohada korrupsiyaga qarshi kurash masalalariga bagʻishlangan yigʻilish boʻlib oʻtdi.
Viloyatdagi sport tashkilotlari, federatsiyalar, maktab va muassasalar rahbarlari, murabbiylar, terma jamoalar aʼzolari hamda prokuratura, ichki ishlar organlari, DXX, adliya tizimlari masʼullari ishtirokida tashkil etilgan tadbirda joriy yilning 5-martida uyushtirilgan Korrupsiyaga qarshi kurashish milliy kengashi yigʻilishida davlatimiz rahbari tomonidan belgilab berilgan vazifalar ijrosini taʼminlash masalalariga eʼtibor qaratildi.
Oʻz navbatida, viloyat prokurori sport tashkilotlari va muassasalarida oʻtkazilgan tekshiruvlar natijalari haqida maʼlumot berdi. Mazkur jarayonda byudjet mablagʻlarini talon-taroj qilish, boshqa hududda yashovchi sportchilar erishgan natijalarni oʻziniki qilib koʻrsatish orqali ustama olish holatlari aniqlagani bildirildi.
Xuddi shunday, mashgʻulotlar sifati, ijtimoiy himoya, yoshlarni qoʻllab-quvvatlash, seleksiya borasidagi kamchiliklar tilga olindi.
Koʻtarilgan masalalar yuzasidan viloyat ichki ishlar boshqarmasi boshligʻi va boshqa huquqni muhofaza qiluvchi organlar masʼullari, shuningdek, murabbiy va sportchilarning fikr va mulohazalari tinglandi.
Yakunda mavjud nuqsonlarni bartaraf etish, chunonchi, korrupsion holatlarga barham berishga oid yoʻl xaritasini ishlab chiqish va hayotga izchillik bilan tatbiq etishga kelishib olindi.
Jizzax viloyati IIB Axborot xizmati