Yoshlar oyligi doirasida IIV Qorovul qoʻshinlari harbiy xizmatchilari Toshkent, Namangan, Navoiy va Zarafshon shaharlarida oʻtkazilgan tadbirlarda faol ishtirok etishdi
2025-06-13 09:40:00 / Yangiliklar
Yoshlar oyligi doirasida, dastavval, Toshkent shahrida joylashgan qoʻshinga qarashli 7531 harbiy qism bir guruh harbiy xizmatchilari poytaxtimizdagi Adiblar xiyoboniga tashrif buyurib, milliy adabiyotimiz rivojiga hissa qoʻshgan yozuvchi hamda shoirlar hayoti va ijodi bilan yaqindan tanishishdi. Shundan soʻng, Toshkent Davlat Transport Universitetida boʻlib, tashkil etilgan davra suhbatida talabalarga zamonaviy armiya hayoti, sohaning ijtimoiy va strategik ahamiyati borasida soʻzlab, oliy oʻquv yurtidagi mavjud muzey faoliyati bilan bevosita tanishishdi.
Navoiy shahridagi 7532 harbiy qismda esa oʻquvchi yoshlar uchun “Komandir va Yoshlar” uchrashuvi tashkil etilib, unda harbiy xizmatchilar oʻz hayotiy tajribalari, harbiy xizmatning oʻrni va ahamiyati, xizmat vaqtidagi sinovli, qiziqarli va esda qolarli voqealar haqida soʻzlab berishdi.
Bu kabi uchrashuvlar Zarafshon shahridagi 7551 va Namangan viloyatidagi 7552 harbiy qism harbiy xizmatchilari bilan ham hududlardagi umumtaʼlim maktablarida davom ettirildi. Unda, harbiy xizmatchilar va yoshlar oʻrtasida mazmunli va maroqli suhbatlar tashkil etilib, madaniy-maʼrifiy koʻngilochar dasturlar va sport oʻyinlari koʻtarinki ruhda oʻtkazilgan boʻlsa, vatanparvarlikni targʻib qiluvchi videoroliklar namoyishi esa barchada qiziqish uygʻotdi.
Shu oʻrinda, bu tadbirlar yoshlarga oid davlat siyosatini amalga oshirish, harbiy xizmatchilar va yoshlar orasida sogʻlom maʼnaviy muhitni shakllantirish, ularning jamiyatda ijtimoiy faolligini oshirish hamda ularni vatanga sadoqat ruhida tarbiyalashda muhimligini taʼkidlash joizdir.
Yoshlar oyligi doirasidagi tadbirlar qoʻshindagi barcha harbiy qism va boʻlinmalarda faol tarzda davom etmoqda.
IIV Qorovul qoʻshinlari qoʻmondonligi Axborot guruhi