O‘zbekiston Respublikasi Madaniyat vazirligi

O‘zbekiston Respublikasi Prezidentining 2023-yil 23-dekabrdagi “Aholiga madaniy xizmat ko‘rsatish darajasini yanada oshirish chora-tadbirlari to‘g‘risida” PQ–406-son hamda 2023-yil 11-iyuldagi “Respublikada milliy askiya va qiziqchilik san’atini yanada rivojlantirish chora-tadbirlari to‘g‘risida” PQ–222-son qarorlari ijrosini ta’minlash maqsadida, O‘zbekiston Respublikasi Madaniyat vazirligi tomonidan “Xush kayfiyat” respublika yosh qiziqchi va askiyachilar tanlovi o‘tkazildi.

 

Tanlov joriy yilning 7-may kuni Andijon viloyatida joylashgan Andijon viloyati musiqali drama teatrida bo‘lib o‘tdi.

 

Tanlov 2 ta yo‘nalishda:

- askiyachilik san’ati yo‘nalishi jamoaviy tarzda;

- qiziqchilik san’ati va “Stand-Up” yo‘nalishida respublikamizda faoliyat yuritayotgan 7 yoshdan 70 yoshgacha bo‘lgan 30 nafardan ortiq askiya va qiziqchilar, so‘z ustalari ishtirok etishdi. G‘olib va sovrindorlarini taqdirlash marosimi joriy yilning 9-may kuni Andijon viloyatining Bobur shaharchasida bo‘lib o‘tishi belgilandi.

 

Shuningdek, 9-may Xotira va qadrlash kuni munosabati bilan sohada faoliyat yuritgan ustoz san’atkorlar, qiziqchi va so‘z ustalarini xotirlash ularning ijod namunalarini keng targ‘ib qilish maqsadida, “Askiya va qiziqchilar sayli” nomli askiya kechasi o‘tkaziladi.

 

Mazkur askiya kechasida O‘zbekiston Respublikasida xizmat ko‘rsatgan artist Mirzabek Xolmedov, Valijon Shamshiyev, Zokir Ochildiyev, Boltaboy Toshmatov, Qah-qaha guruhi, Dizayn jamoasi a’zolari hamda bir qator qiziqchi va so‘z ustalari ishtirok etishi rejalashtirilgan.