O‘zbekiston Respublikasi Madaniyat vazirligi

Bugun, 9-may – Xotira va qadrlash kuni munosabati bilan vazir Ozodbek Nazarbekov madaniyat va san’at sohasida uzoq yillar faoliyat yuritib, soha rivojiga ulkan hissa qo’shgan faxriylar hamda ularning oila a’zolari holidan xabar oldi.

 

Dastlab, O‘zbekistonda xizmat ko‘rsatgan madaniyat xodimi Baxtiyor Sayfullayevning xonadonida bo‘ldi.

 

O‘z umrini madaniyat va san’atga baxshida etgan Baxtiyor Sayfullayev mamlakatimizda mazkur sohalarni rivojlantirish, yetuk kadrlar tayyorlash hamda boy milliy madaniyatimiz, betakror san’atimizni dunyo bo‘ylab keng targ‘ib etishga katta hissa qo‘shdi. 

 

Bir qator ijodiy tashkilotlarda rahbarlik lavozimlarda faoliyat ko‘rsatgan Baxtiyor Sayfullayev tashabbuskor, izlanuvchan hamda yetuk olim, ustoz sifatida o‘ziga xos tajriba maktabini yaratdi, ko‘plab shogirdlarni tarbiyalab yetishtirdi.

 

Baxtiyor Sayfullayev so‘nggi yillarda senator hamda Senatning qo‘mita raisi lavozimida juda samarali faoliyat olib bordi, doimo el-yurtning tashvish va muammolari bilan yashadi, katta bilim va tajribaga ega, kuyunchak inson sifatida xalqimiz qalbidan joy oldi. U madaniyat, san’at, sport va yoshlar masalalariga oid muhim qonun hujjatlarini ishlab chiqish, hayotga tatbiq etishda faol ishtirok etdi.

 

Taniqli davlat va jamoat arbobi Baxtiyor Sayfullayevning yurtimiz taraqqiyoti yo‘lida olib borgan samarali faoliyati davomida erishgan yutuqlari mamlakatimiz rahbariyati tomonidan e’tirof etilib, Qoraqalpog‘iston Respublikasi san’at arbobi faxriy unvoni va “Mehnat shuhrati” ordeni bilan taqdirlangan.

 

Fidoyi inson, tajribali rahbar hamda sodiq do‘st Baxtiyor Sayfullayevning yorqin xotirasi biz – hamkasblari yodida abadiy saqlanib qoladi.