Ayni kunlarda Samarqand shahri yana bir nufuzli tadbirga mezbonlik qilmoqda. Samarqandda joriy yilning 26-27-may kunlari “Samarqand shahri – 2025 yil Islom dunyosi madaniy poytaxti” tadbirlari bo‘lib o‘tadi.

 

Unda, dunyoning 20 dan ortiq AYSESKO tashkilotiga a’zo davlatlaridan vakillar ishtirok etishadi. 

 

Bugungi kunda O‘zbekistonning AYSESKO bilan ta’lim, ilm-fan va madaniyat sohalaridagi hamkorlik aloqalari  izchil rivojlanib bormoqda.

 

Hech shubhasiz har qanday inson AYSESKO timsolida eng muhim insonparvarlik masalalarining yechimiga ijodiy yondashuvchi betakror tashkilotni ko‘radi.

 

O‘zbekiston AYSESKO tashkilotiga a’zo bo‘lganiga qisqa fursat bo‘lishiga qaramasdan, o‘tgan davr mobaynida hamkorlikda juda katta loyihalar amalga oshirildi.

 

Xususan, AYSESKO tomonidan 2007-yilda Toshkent shahri, 2020-yilda Buxoro shahri “Islom madaniyati poytaxti” deb e’lon qilindi.

 

Shu bilan birga, O‘zbekiston Respublikasi Prezidenti Shavkat Mirziyoyev tashabbusi hamda AYSESKO tashkiloti bilan hamkorlikda 2021-yil sentyabr oyida Xiva shahrida “Markaziy Osiyo dunyo sivilizatsiyalari chorrahasida” nomli xalqaro madaniy forum o‘tkazildi.

 

2023-yilning 25-27-sentyabr kunlari Doha shahrida bo‘lib o‘tgan Islom dunyosi madaniyat vazirlarining 12-konferensiyasida 2025-yilda Samarqand shahri “Islom olami madaniyat poytaxti” sifatida e’lon qilindi.

 

Joriy yilning 27-may kuni Samarqandda islom olami madaniyat vazirlari ishtirokida “Islom dunyosining ma’naviy merosi va madaniy ifodalari: xattotlik, musiqa, she’riyat va hamjihatlik” xalqaro forumi hamda “Boqiy shahar” majmuasi markazida “Samarqand shahri – 2025-yil Islom dunyosi madaniyat poytaxti” tadbirlarining tantanali ochilish marosimi bo‘lib o‘tadi.

 

Ma’lumot uchun: Islom fan, ta’lim va madaniyat masalalari bo‘yicha tashkiloti (AYSESKO) Islom hamkorlik tashkilotiga (IHT) a’zo davlatlar tashqi ishlar vazirlarining 10-yig‘ilishi (Marokash, 1979-yil) doirasida qabul qilingan qarorga muvofiq ta’sis etilgan bo‘lib, o‘z faoliyatini 1982-yil may oyida boshlagan. Bosh qarorgohi Rabot (Marokash) shahrida joylashgan.

Hozirgi kunda tashkilotga 54 ta mamlakat a’zo hisoblanadi. 2019-yil maydan Bosh direktor lavozimini Salim bin Muhammad al-Malik egallab kelmoqda.

AYSESKO amalda YUNESKO funksiyalariga o‘xshash vazifalarni bajaradi. Tashkilot madaniy merosni asrash, tarixiy-me’moriy obidalar va yodgorliklarni qayta tiklash, muzeylar va ko‘lyozmalarni ta’mirlash, ilmiy tadqiqot tadbirlari, jumladan, konferensiyalar, seminarlar va davra suhbatlarini o‘tkazib keladi.

Shuningdek, har yili a’zo davlatlarning ta’lim, ilmiy tadqiqotlar, atrof-muhit, madaniyat vazirlari yig‘ilishlari o‘tkaziladi.