O‘zbekiston Respublikasi Madaniyat vazirligi

Turkmanistonning “Avaza – do‘stlik markazi”da bo‘lib o‘tgan Xalqaro raqs va folklor festivali san’at, madaniyat va do‘stlik uyg‘unligidagi unutilmas lahzalarni tuhfa etdi. Festivalda Hindiston, Tojikiston, Eron va O‘zbekiston kabi davlatlardan mashhur raqs ustalari, folklor jamoalari ishtirok etishdi.

 

Mazkur festivalda O‘zbekiston delegatsiyasi tarkibida ishtirok etgan Buxoro viloyati filarmoniyasi jamoasi ham o‘zbek milliy raqslari, kuy va qo‘shiqlari bilan tomoshabinlar qalbidan joy oldi.

 

Festival doirasidagi tadbirlarda o‘zbekistonlik Zilola Bagirova o‘zining mahorat darslari orqali turkmanistonlik va boshqa xorijlik raqs mutaxassislariga o‘zbek raqs san’atining nazariyasi va nozik jihatlarini professional darajada sharhlab berdi. Bundan tashqari sahnada namoyish etilgan an’anaviy va zamonaviy raqs uslublari ishtirokchilarning olqishlariga sazovor bo‘ldi.

 

Festival yakunida barcha ishtirokchilar qatori o‘zbekistonlik ijodkorlar ham milliy ohang va raqslaridagi badiiylik uchun maxsus diplom va esdalik sovg‘alari bilan taqdirlanishdi.

 

Ushbu xalqaro festival san’at orqali xalqlarni yaqinlashtirish, madaniyatlar ko‘prigini mustahkamlash yo‘lidagi yana bir muhim qadam bo‘lib, O‘zbekiston madaniy diplomatiyasining xalqaro nufuzini yuksaltirishga munosib hissa qo‘shadi!