O‘zbekiston Respublikasi Madaniyat vazirligi

Ayni kunlarda O‘zbekiston Respublikasi madaniyat vazirining birinchi o‘rinbosari Bahodir Ahmedov boshchiligidagi delegatsiya Mo‘g‘ulistonning Ulan-Bator shahrida xizmat safarida bo‘lib turibdi.

 

Xizmat safari davomida Mo‘g‘uliston Madaniyat, sport, turizm va yoshlar vazirligi rahbariyati bilan uchrashuv tashkil etildi.

 

Uchrashuvda joriy yilning 22-25-iyun kunlari Ulan-Bator shahrida tashkil etilishi rejalashtirilayotgan "O‘zbekiston madaniyati kunlari" tadbirlarini yuqori darajada o‘tkazish, madaniyat kunlari doirasida bo‘lib o‘tishi ko‘zda tutilgan gala-konsert va O‘zbekiston madaniyati va tarixini o‘zida aks ettirgan fotoko‘rgazmaga tayyorgarlik ko‘rish masalalari muhokama qilindi.

 

Ma’lumot uchun: 2024-yilning iyun oyida Mo‘g‘uliston davlat rahbarining O‘zbekistonga rasmiy tashrifi doirasida Toshkent shahrida "Mo‘g‘uliston madaniyati" kunlari tadbirlari bo‘lib o‘tgan edi. Ikki tomonlama kelishuvga binoan joriy yilda Ulan-Bator shahrida "O‘zbekiston madaniyat kunlari" tadbirlarini o‘tkazish ko‘zda tutilgan.

 

Shuningdek, shu kuni Ulan-Bator shahridagi "Chingizxon" davlat muzeyi faoliyati bilan yaqindan tanishildi. Muzey rahbariyati bilan tashkil etilgan uchrashuv davomida kelajakda mazkur muzeyda o‘zbek madaniyatini aks ettiruvchi ko‘rgazma o‘tkazish taklifi bildirildi.

 

So‘ng delegatsiya a’zolari "O‘zbekiston madaniyati kunlari" tadbirlari bo‘lib o‘tishi rejalashtirilgan Ulan-Bator shahridagi "Mo‘g‘uliston opera va balet teatri"ga tashrif buyurdilar. Bu yerda madaniyat kunlari tadbirlarini o‘tkazish yuzasidan amalga oshirilayotgan tayyorgarlik ishlari bilan yaqindan tanishdilar.

 

Eslatib o‘tamiz: Mo‘g‘ulistonda amalga oshirilishi rejalashtirilgan "O‘zbekiston madaniyati kunlari" doirasidagi tadbirlar joriy yilning 22-25-iyun kunlari Ulan-Bator shahrida tashkil etilishi rejalashtirilgan.