O‘zbekiston Respublikasi Madaniyat vazirligi

Mazkur namoyishda O‘zbekiston davlat san’at va madaniyat instituti rektori, professor Nodirbek Sayfullayev, teatr direktori, O‘zbekistonda xizmat ko‘rsatgan artist Azim Mullaxonov hamda institut Badiiy kengashi a’zolari va professor-o‘qituvchilar ishtirok etishdi.

 

Ushbu spektakl institut hamda teatr jamoalari hamkorligida sahnalashtirilgan bo‘lib, unda taniqli va tajribali aktyorlar bilan birgalikda Musiqali teatr aktyorligi ta’lim yo‘nalishi 3-bosqich talabalari ham katta sahnaga ilk qadamlarini qo‘yishdi.

 

Xususan, Nodirabegim obrazini Mehrinozbegim Abdullayeva, Amir Nasrullo rolini Hasanboy Ibragimov, Madalixon obrazini esa Shahboz Latipov mahorat bilan ijro etdilar.

 

Shuningdek, Musiqali teatr aktyorligi ta’lim yo‘nalishi 3-bosqich talabasi Alisher Abdujabborov rejissyor sifatida ushbu spektaklda faoliyat olib bordi.

 

Sahnalashtiruvchi rejissyorlar Musiqali teatr san’ati kafedrasi mudiri Rashid Usnatov va  teatr Bosh rejissyori Doston Haqberdiyev. Rejissyor yordamchisi kafedra katta o‘qituvchisi Bobur Husanov.

 

Taniqli shoir Turob To‘laning asari hamda bastakor Farhod Alimov musiqasi asosida sahnalashtirilgan ushbu asarda Qo‘qon xonligining XIX asrdagi hayoti, xususan, shoira va malika Nodirabegimning taqdiri yuksak badiiy mahorat bilan tasvirlangan.

 

Namoyishdan so‘ng institut Badiiy kengashi tomonidan spektakl muhokamasi o‘tkazildi.

 

Muhokama avvalida institut rektori, professor Nodirbek Sayfullayev  “O‘zbekiston Respublikasi Prezidentining 2024-yil 22-noyabrdagi “Teatrlarning jamiyat madaniy hayotidagi ahamiyatini oshirish va ularning faoliyatini yanada qo‘llab-quvvatlash chora-tadbirlari to‘g‘risida”gi qarori teatr san’atining taraqqiyotida muhim tarixiy bosqich bo‘ldi.

 

Mazkur qarorda ta’lim jarayonini amaliyot bilan chuqur integratsiyalashga alohida e’tibor qaratilib, talabalarning haftasiga kamida ikki kun teatr sahnasida amaliy mashg‘ulotlar o‘tashi belgilandi.

 

Shu asosda institut rahbariyatining tashabbusi bilan joriy yilning 28-mart kuni Muqimiy nomidagi O‘zbekiston davlat musiqali akademik teatrida “Musiqali teatr san’ati” kafedrasining Lutfixonim Sarimsoqova nomidagi filiali tashkil etilgan edi.

 

Mazkur filial talabalarga teatr muhiti bilan bevosita tanishish, obrazli aytganda, teatrning “changini yutish” imkonini berdi. Bu esa ularning malakali mutaxassis sifatida shakllanishlariga mustahkam zamin yaratmoqda.

 

Bugungi “Nodirabegim” musiqali dramasida talabalarning faol ishtiroki aynan ana shu samarali jarayonning yorqin namunasidir. O‘zbekiston davlat san’at va madaniyat institutida bu kabi tashabbuslar kelgusida ham izchil davom ettiriladi”. – dedi.

 

Shuningdek, institut Badiiy kengashi a’zolari – San’atshunoslik va madaniyatshunoslik kafedrasi professorlari Omonulla Rizayev, Muhabbat To‘laxo‘jayeva, Sarvinoz Qodirova, kafedra professori vazifasini bajaruvchi Muqaddas Ahmadjonova va kafedra mudiri Faxriddin Abduvohidov, Dramatik teatr va kino san’ati kafedrasi professorlari Munavvara Abdullayeva, Hamida Mahmudova, Vokal kafedrasi mudiri Saodat Muzaffarova va kafedra dotsenti Dilmurod Uzoqov, Cholg‘u ijrochiligi kafedrasi professori O‘rozali Toshmatov,  Kino, televideniye va radio rejissyorligi kafedrasi dotsenti Hilol Nasimov, Estrada va ommaviy tomoshalar san’ati kafedrasi professori Marina Yusupovalar fikr bildirishdi.

 

Jumladan, ushbu mutaxassislar avvalo, bugun talabalar va professional aktyorlarning bitta sahnada rol ijro etishi katta yutuq va teatr san’atining kelgusi rivoji uchun ham zarur qadam ekanligini, bunday loyihalar ko‘paytirish tashabbusidan mamnun ekanliklarini alohida e’tirof etishdi. Shu bilan birga, bugun Nodirabegimni jonlantirgan talaba-qizning ijrosi ham ma’qul bo‘lgani ayrim o‘zgartirishlar kiritilsa, yaxshi obraz yaralishini e’tirof etishdi.

 

Bundan tashqari, spektaklning ayrim o‘rinlarini yanada boyitilsa va o‘zgartirishlar kiritilsa, spektakl sifatli badiiy asarga aylanishini aytib o‘tishdi.