Forumi doirasida “Ayollarning innovatsiyalar va tadbirkorlik sohasidagi hamkorligi” sessiyasi boshlandi
2025-06-02 21:00:00 / Vazirlik yangiliklar
O‘zbekiston – Xitoy hududlararo forumi doirasida “Ayollarning innovatsiyalar va tadbirkorlik sohasidagi hamkorligi” sessiyasi boshlandi.
Mazkur tadbirda vazir o‘rinbosari Ozoda Jo‘rayeva so‘zga chiqib, qurilish va kommunal sohalarda xotin-qizlarning o‘rni, tizimga tadbirkorlik va innovatsion texnologiyalar joriy etilishining istiqbollari xususida gapirdi.
- 2016-yilda qurilish sohasida 56 ming yangi ish o‘rni yaratilgan bo‘lib, 2025-yil yakunigacha mazkur ko‘rsatkichni 169 mingtaga yetkazish rejalashtirilgan. Joriy yilning o‘tgan davri mobaynida 87 mingta ish o‘rniyaratildi. Quvonarli jihati, shundan 30 ming nafarini ayollar tashkil etmoqda.
Shuningdek, mamlakatimizda ko‘p qavatli uylarga xizmat ko‘rsatuvchi boshqaruv servis kompaniyalarining 46 foiziga ayollar rahbarlik qiladilar. 10 ming nafardan ortiq xotin-qizlarimizning esa aynan mazkur sohada ish bilan bandligi ta’minlangan. Ulardagi shijoat, qiyinchilikdan qo‘rqmaslik, sohani takomillashtirish yo‘lidagi mashaqqatli mehnati yuksak e’tirofga sazovordir, - dedi O.Jo‘rayeva.
Ta’kidlanganidek, mamlakatimizda ayollarning manfaatlarini qo‘llab-quvvatlashga qaratilgan yuksak e’tibor bunyodkorlik va kommunal sohani rivojlantirishda muhim ahamiyat kasb etmoqda.
Tadbir yakunida Xitoy ishlab chiqarish va xizmat ko’rsatish korxonalari bilan B2B munosabatlarni rivojlantirish yuzasidan hamkorlik loyihalari muhokama qilindi.