O‘zbekiston Bosh vaziri o‘rinbosari Jamshid Xo‘jayev Peterburg xalqaro iqtisodiy forumida (PXIF) nutq so‘zladi
2025-06-21 19:00:00 / Yangiliklar
2025-yil 19-iyun kuni O‘zbekiston Respublikasi Bosh vaziri o‘rinbosari Jamshid Xodjayev Peterburg xalqaro iqtisodiy forumida (PXIF) ishtirok etdi. Tadbir doirasida u “Energetika bozoridagi global muvozanat: ishlab chiqaruvchilar va iste’molchilar manfaatlari o‘rtasida muvofiqlik izlash” mavzusidagi panel sessiyasida nutq so‘zladi.
Mazkur muhokamada OPEK Bosh kotibi Haysam al-Gays, Turkiya Energetika va tabiiy resurslar vaziri Alparslan Bayraktar, Bahrayn Neft va atrof-muhit vaziri Muhammad bin Muborak bin Dayna, Rossiya Federatsiyasi Hukumatining Rais o‘rinbosari Aleksandr Novak hamda Vengriya va Serbiya vazirliklari vakillari ishtirok etdi.
Jamshid Xodjayev o‘z nutqida, O‘zbekistonning “yashil” energetikani rivojlantirishga qat’iy intilayotganini, bu borada mamlakatning tabiiy salohiyati va investorlar uchun yaratilgan qulay shart-sharoitlarga tayanganini alohida ta’kidladi:
“So‘nggi yillarda amalga oshirilgan izchil institutsional va huquqiy islohotlar O‘zbekistonning investitsion jozibadorligini, xususan, yashil energetika sohasida tubdan o‘zgartirdi. Bugun yoqilg‘i-energetika tizimi misli ko‘rilmagan transformatsiyani boshdan kechirmoqda, va energetik o‘tish ishlab chiqaruvchilar va iste’molchilar o‘rtasidagi o‘zaro hamkorlikning yangi tamoyillarini shakllantirmoqda.”
Shunday qilib, O‘zbekistonda “yashil” o‘tishning asosini nafaqat tabiiy resurslar, balki bozor tamoyillariga asoslangan rag‘batlantiruvchi va huquqiy mexanizmlar tizimi ham tashkil etadi.
“O‘zbekiston Respublikasi Prezidenti Shavkat Mirziyoyev rahbarligida energetika tizimini modernizatsiya qilishga qaratilgan keng ko‘lamli islohotlar amalga oshirildi. Natijada, energiya tizimining o‘rnatilgan quvvati 50 foizga oshib, 25 GVt ga yetdi. Quyosh va shamol energetikasi asosida 3,5 GVtdan ortiq quvvatlar ishga tushirildi. Energiya saqlash imkoniyatlari ham bosqichma-bosqich kengaymoqda. 2030-yilga borib elektr energiyasi ishlab chiqarishni 135 milliard kVt·soatga yetkazish, qayta tiklanuvchi energiya manbalarining o‘rnatilgan quvvatini esa 5 barobardan ko‘proqqa — 20 GVtdan oshirish rejalashtirilgan dastur qabul qilindi. Shuningdek, Yevropa mamlakatlariga “yashil” energiya eksportini o‘z ichiga olgan mintaqaviy tashabbuslar ham amalga oshirilmoqda,” — deya ta’kidladi Jamshid Xodjayev.
Panel sessiyasi ishtirokchilariga, sohaga oid barcha loyihalar davlat-xususiy sheriklik tamoyillari asosida va to‘g‘ridan-to‘g‘ri investitsiyalarni jalb etgan holda amalga oshirilayotgani haqida ham ma’lumot berildi.
“O‘zbekistonda quyosh, shamol va suv resurslaridan foydalanib yangi elektr ishlab chiqarish quvvatlarini yaratish uchun ulkan imkoniyatlar mavjud — bu Xudoning in’omidir. Eng to‘g‘ri yo‘l — bu salohiyatdan to‘liq foydalanishdir, ayniqsa, investorlarni jalb etuvchi qulay investitsiya muhiti yaratilgan sharoitda,” — dedi spiker.