O‘zbekiston Respublikasi Mudofaa vazirligi

Tadbirlarda Mudofaa vazirligi harbiy okruglari harbiy xizmatchilari, davlat va jamoat tashkilotlari rahbarlari, madaniyat namoyandalari, kuch tuzilamalari, yoshlar va keng jamoatchilik vakillari ishtirok etdi.

Xususan, Samarqandda o‘tgan bayram tadbirlari Amir Temur maqbarasini ziyorat qilishdan boshlandi. Buyuk jahongir yodga olindi.

Shundan so‘ng Samarqand, Toshkent va Shaxrisabz shaharlarida joylashgan Sohibqironning haykali poyiga gulchambarlar qo‘yilib, buyuk sarkarda xotirasiga ehtirom ko‘rsatildi.

Tadbir davomida so‘z olganlar keyingi yillarda mamlakatimizda koʻhna tariximiz va buyuk ajdodlarimizning boy merosini oʻrganish, nomlarini abadiylashtirish borasida salmoqli ishlar amalga oshirilayotgani, shuningdek, ajdodlarimiz qoldirgan tarixiy asarlarga bugun jahon hamjamiyati ham katta qiziqish bildirayotganini taʼkidladi.

Mudofaa vazirligi tizimida kishilik sivilizatsiyasining daholaridan biri, Sharq va Gʻarbni mo‘g‘ullar hukmronligidan ozod etgan, Temuriylar Uyg‘onish davri poydevorini qo‘ygan Sohibqiron bobomizning tavallud topgan kuni munosabati bilan o‘tkazilayotgan tadbirlar davom etmoqda.

Mudofaa vazirligi Axborot va ommaviy kommunikatsiyalar departamenti