O‘zbekiston Respublikasi Mudofaa vazirligi

Tadbir davomida ta’kidlanganidek, harbiy xizmatchilarni xalqaro harbiy hamkorlik va harbiy diplomatiya yo‘nalishida maqsadli tayyorlash, ularning xalqaro munosabatlar, O‘zbekiston Respublikasining tashqi siyosiy faoliyati, diplomat protokoli va etiketiga oid bilimlarini oshirish borasida Diplomatiya akademiyasining o‘rni beqiyosdir. Akademiya bu borada katta tajribaga ega va muntazam ravishda ilg‘or yondashuvlarni joriy etmoqda.

Malaka oshirish kurslari davomida ofitserlarning nazariy bilimlarini chuqurlashtirish, ularning tahliliy va kreativ fikrlash qobiliyatlarini rivojlantirishga alohida e’tibor qaratildi. Kurs doirasida xalqaro huquq, harbiy diplomatiya, muzokara olib borish san’ati, diplomat protokoli, notiqlik va ritorika kabi yo‘nalishlarda yuqori malakali professor-o‘qituvchilar tomonidan amaliy mashg‘ulotlar va treninglar o‘tkazildi.

Tadbirda so‘zga chiqqan tinglovchilar tomonidan mashg‘ulotlar zamonaviy pedagogik texnologiyalar asosida olib borilgani, o‘qituvchilarning yuqori malaka va amaliy tajribaga egaligi alohida e’tirof etildi. Ustozlardan olingan bilim va ko‘nikmalar ularning kelgusi faoliyatida, ayniqsa, xorijiy sheriklar bilan harbiy hamkorlikni rivojlantirishda muhim o‘rin tutishi ta’kidlandi.

Tadbir yakunida Diplomatiya akademiyasi professor-o‘qituvchilariga Mudofaa vazirligi rahbariyati nomidan chuqur minnatdorlik bildirildi.

Mudofaa vazirligi Axborot va ommaviy kommunikatsiyalar departamenti