Uchrashuvda XMKning O‘zbekiston va Turkmanistondagi mintaqaviy boshqaruvchisi Nil Makkeyn, XMKning O‘zbekistondagi loyihalar koordinatori Sajida Tashpulatova, Iqtisodiyot va moliya vaziri o‘rinbosarlari Jasur Karshibayev va Otabek Fozilkarimov hamda boshqa mas’ul vakillar ishtirok etdi.

Muloqot davomida tomonlar davlat-xususiy sheriklik yuzasidan o‘zaro hamkorlik, xususan, elektr energiya tarmoqlarini modernizatsiya qilish, ta’lim, sog‘liqni saqlash, transport va suv xo‘jaligi sohalarida amalga oshirilayotgan loyihalar bo‘yicha o‘zaro fikr almashdi hamda sohalardagi DXSh loyihalarini jadallashtirish bo‘yicha muhokamalar o‘tkazdi.

O‘z navbatida, Xalqaro moliya korporatsiyasi vakillari mamlakatimizda DXSh loyihalarini qo‘llab-quvvatlash maqsadida qabul qilingan O‘zbekiston Respublikasi Prezidentining 2024-yil 30-avgustdagi “O‘zbekiston Respublikasida 2024–2030-yillarda davlat-xususiy sheriklikni rivojlantirish chora-tadbirlari to‘g‘risida”gi Qarorining muhim ahamiyatga ega ekanligini hamda ushbu qaror istiqbolda DXSh yo‘nalishini yangi bosqichga olib chiqishda navbatdagi ulkan qadam bo‘lganligini ta’kidladi.

Shuningdek, suhbatda tomonlar xususiylashtirish sohasidagi bugungi tendensiyalar, jumladan, davlat ishtirokidagi banklar va korxonalarni xususiylashtirish jarayonlarini kengaytirish, O‘zbekistonda elektromobil sanoati va soha infratuzilmasini rivojlantirish yuzasidan fikr almashdilar.

Muzokaralar yakunida tomonlar o‘zaro manfaatli hamkorlik aloqalarini mustahkamlash va yanada kengaytirish hamda oldinga qo‘yilgan maqsadlarga erishishda tizimli faoliyat olib borish va samaradorlikni oshirishga kelishib oldilar.