Uchrashuvda XVJning O‘zbekistondagi vakolatxonasi rahbari Koba Gvenetadze, XVJning katta iqtisodchilari Laurens Dvayt va Alexandro Simone hamda O‘zbekiston Respublikasi Markaziy banki boshqaruv raisi Mamarizo Nurmuratov, Iqtisodiyot va moliya vazirining birinchi o‘rinbosari Ilhom Norqulov, vazir o‘rinbosarlari Axadbek Xaydarov va Jasur Karshibayev hamda boshqa mas’ul vakillar ishtirok etdi.

Muloqot davomida tomonlar O‘zbekistondagi joriy iqtisodiy tendensiyalar, xususan, iqtisodiy o‘sish, inflatsiya darajasining barqarorligini ta’minlash, xizmatlar sohasini rivojlantirish, budjet prognozlari yuzasidan va boshqa sohalarda amalga oshirilayotgan ishlar bo‘yicha muhokamalar o‘tkazdi.

Shuningdek, suhbatda tomonlar iqtisodiyotni barqaror rivojlantirish bo‘yicha kelajakdagi rejalar, soliq tizimini takomillashtirish, davlat ishtirokidagi korxonalarni xususiylashtirish jarayonlarini jadallashtirish, Jahon savdo tashkilotiga a’zo bo‘lish istiqbollari, yashirin iqtisodiyotni kamaytirish va elektr bilan harakatlanuvchi avtomobillar sanoatini rivojlantirish yuzasidan fikr almashdilar.

Muzokaralar yakunida tomonlar o‘zaro manfaatli hamkorlik aloqalarini mustahkamlash va yanada kengaytirish hamda oldinga qo‘yilgan maqsadlarga erishishda tizimli faoliyat olib borishga kelishib oldilar.