Muloqot chog‘ida agrar sohada ikki qo‘shni davlat hamkorligini yangi bosqichga olib chiqish, istiqbolli yo‘nalishlarda yangi imkoniyatlarni ishga solish hamda o‘zaro manfaatli loyihalarni amalga oshirish masalalari muhokama qilindi.

Uchrashuvda ta’kidlanganidek, O‘zbekiston va Qirg‘izistonning agrar sohadagi hamkorligi tobora mustahkamlanib, har ikki tomon uchun manfaatli bo‘lgan loyihalar muvaffaqiyatli amalga oshirilmoqda.

Elchi Duyshonkul Chotonov O‘zbekistonda qishloq xo‘jaligi sohasida mavjud imkoniyatlar, agrar fan yo‘nalishida erishilgan yutuqlar xususida fikr bildirar ekan, chorvachilik, bog‘dorchilik va meva-sabzavotchilik yo‘nalishlarida hamkorlikni rivojlantirish hamda o‘zaro tajriba almashish muhimligini ta’kidladi.

O‘z navbatida, vazir Ibrohim Abdurahmonov global miqyosda oziq-ovqat xavfsizligini ta’minlash masalalariga to‘xtalar ekan, agrar sohadagi har bir hamkorlik loyihasi nafaqat ikki davlat, balki butun mintaqa xalqlari uchun manfaatli bo‘lishi lozimligini qayd etdi.

Shuningdek, uchrashuvda kartoshka yetishtirish va uning urug‘chiligini rivojlantirish, Qirg‘iziston hududida zamonaviy bog‘lar barpo etish, moyli ekinlarni yetishtirish va qayta ishlash, chorvachilik kabi yo‘nalishlarda istiqbolli hamkorlik imkoniyatlari va ularni amalga oshirish mexanizmlari ko‘rib chiqildi.