Samimiy va do‘stona ruhda o‘tgan uchrashuv davomida ikki mamlakat o‘rtasidagi xalqaro hamkorlik munosabatlari, xususan, qishloq xo‘jaligi hamda ta’lim sohalaridagi sheriklik aloqalari yuksak baholandi.

Muloqot chog‘ida akademik almashinuv dasturlarini kengaytirish, qo‘shma ilmiy-tadqiqot loyihalarini amalga oshirish, zamonaviy agrar texnologiyalarni joriy etish, shuningdek, malakali yosh mutaxassislar tayyorlash borasida hamkorlik masalalari keng muhokama qilindi.

Vazir o‘z navbatida Chungnam Milliy Universiteti bilan “Global Campus” loyihasi doirasidagi hamkorlikni yanada mustahkamlash ilmiy salohiyatni oshirishda muhim omil ekanini ta’kidladi. Shuningdek, yiliga 200–300 nafar talabani akademik almashinuv dasturlari orqali jalb etish yosh kadrlar uchun keng imkoniyatlar ochishini qayd etdi.

Tomonlar qo‘shma ilmiy laboratoriyalar tashkil etish, salohiyatli kadrlarni tayyorlashda hamkorlik qilish, talabalarning bakalavriat va magistratura bosqichlarida koreyalik olimlar ilmiy rahbarligida faoliyat olib borishini yo‘lga qo‘yish borasida fikr almashishdi.

Professor Kim Jeong Kyoum O‘zbekistonda agrar sohada amalga oshirilayotgan islohotlarni yuqori baholab, Chungnam Milliy Universiteti ushbu islohotlarda faol ishtirok etishga tayyor ekanini ta’kidladi.

Uchrashuv yakunida vazir istiqbolli loyihalarni amaliy bosqichga o‘tkazish bo‘yicha mas’ullarga tegishli topshiriqlar berdi.