O‘zbekistonda "O‘zbekiston-2030" strategiyasi, Bolalar saratoni bo‘yicha global tashabbus (GICC), Barqaror rivojlanish maqsadlari doirasida JSST, YUNISEF, Vena xalqaro tibbiyot universiteti va boshqa xalqaro tashkilotlar ko‘magida 2025-2030-yillarga mo‘ljallangan Bolalar saratoniga qarshi kurashish milliy strategiyasi ishlab chiqildi va qabul qilindi.

Ushbu voqea bolalar saratoniga qarshi kurashda yangi bosqichni boshlab beradi, tashxis qo‘yish va davolashda multidistsiplinar yondashuvni ta’minlash orqali pediatriya yordamini ko‘rsatish tizimini takomillashtiradi.

Milliy strategiya sog‘liqni saqlash tizimini modernizatsiya qilishga yo‘l ochadi, kadrlar va infratuzilma salohiyatini mustahkamlaydi, bolalarga barcha darajalarda yuqori sifatli tibbiy yordam ko‘rsatishga yagona yondashuvni shakllantiradi.

"Bolalar saratoni endi oilalar yolg‘iz o‘zi kurashayotgan muammo emas, bu milliy ustuvorlikka aylandi," - deya ta’kidladi O‘zbekiston Respublikasi sog‘liqni saqlash vaziri Asilbek Xudayorov. "Strategiya 2030-yilga kelib yashovchanlik darajasini kamida 60 foizga yetkazish va o‘lim ko‘rsatkichini 2,5 baravar kamaytirish bo‘yicha majburiyatimizga mos keladi, bu esa jahondagi ilg‘or tajribani aks ettiradi".

15-may kuni vazirlik va idoralar, Ota-onalar uyushmasi, xalqaro tashkilotlar, jumladan BMTning O‘zbekistondagi Doimiy muvofiqlashtiruvchisi ofisi, Jahon sog‘liqni saqlash tashkiloti (JSST), BMT Bolalar jamg‘armasi (YUNISEF), BMT Taraqqiyot dasturi (BMTTD), Birlashgan Millatlar Tashkilotining Aholi jahon jamg'armasi (UNFPA), BMT Oziq-ovqat va qishloq xo‘jaligi tashkiloti (FAO), BMTning Loyihalarga xizmat ko‘rsatish boshqarmasi (YUNOPS), jamoat birlashmalari yetakchi vakillari hamda soha mutaxassislari Strategiyani amalga oshirish yo‘llarini muhokama qildilar.

Ko‘p sohali muloqotda ishtirokchilar yaxlit yondashuvning muhimligini ta’kidlab, asosiy jihatlarni muhokama qildilar: erta tashxis qo‘yish va davolashning zamonaviy dasturlarini joriy etish zarurati, tibbiyot muassasalari infratuzilmasini takomillashtirish, malakali kadrlar tayyorlash, onkologik xizmatlarni raqamlashtirish orqali tibbiy yordam ko‘rsatish, keng qamrovli monitoring tizimlari, shuningdek, ruhiy-ijtimoiy va oilaviy qo‘llab-quvvatlash yo‘llari.

Tadbirda so‘zga chiqqan JSSTning O‘zbekistondagi vakolatxonasi rahbari doktor Ashina Xalakdina shunday dedi: "Bolalar saratoni bo‘yicha milliy strategiyani - aniq maqsadlar, aniq chora-tadbirlar va imkon qadar ko‘proq bolalar hayotini saqlab qolish uchun zarur resurslarni o‘z ichiga olgan hujjatni ishlab chiqish O‘zbekiston uchun muhim qadamdir. Ushbu strategiya mamlakatda to‘plangan haqiqiy ma’lumotlar asosida saraton kasalligiga chalingan bolalarga sifatli yordam ko‘rsatish imkoniyatini kengaytirishga yordam beradi".

O‘zbekiston oldinga qarab dadil qadamlar tashladi. Mamlakat JSSTning bolalar saratoniga qarshi kurash bo‘yicha Global tashabbusiga qo‘shildi va saraton kasalligiga chalingan bolalarni dori vositalari bilan ta’minlash bo‘yicha Global platformaning ishtirokchisiga aylandi. Buning natijasida bugun mamlakat bo‘ylab 16 ta tibbiyot muassasasida bolalar xavfsiz, samarali va bepul dori vositalarini olmoqda.

JSST O‘zbekistonni, ayniqsa, strategiya amalda ishlashi uchun boshqaruv tizimini yo‘lga qo‘yish, sa’y-harakatlarni muvofiqlashtirish va ma’lumotlardan foydalanish masalalarida qo‘llab-quvvatlashni davom ettiradi.

 "Bolalar saratoni bo‘yicha ko‘p tarmoqli strategiya muhim bo‘lib, saraton kasalligiga qarshi kurashda rivojlanishni tezlashtirish va barcha muhim tuzilmalarni birlashtirish uchun jiddiy imkoniyat yaratadi," - dedi YUNISEFning O‘zbekistondagi vakolatxonasi rahbari Rexina Mariya Kastijio. "Bunday jamoaviy yondashuv muhim, chunki bolalar saratoniga qarshi kurash nafaqat hayotlarni saqlab qoladi, balki oilalar va sog‘liqni saqlash tizimiga uzoq muddatli iqtisodiy yukni ham kamaytiradi".