Tadbirda Sport vaziri Adkham Ikramov, Milliy Olimpiya qo‘mitasi raisining birinchi o‘rinbosari Otabek Umarov, Milliy Olimpiya qo‘mitasi bosh kotibi Oybek Kasimov, Milliy Paralimpiya qo‘mitasi raisi Muxtorxon Tashxodjayevlar ishtirok etdi. 

Uchrashuv avvalida F.Arimani muzeydagi eksponatlar bilan tanishtirildi, o‘zbek sportining tarixi va O‘zbekiston Respublikasi Prezidenti tomonidan sport sohasiga qaratilayotgan e’tibor va uning bugungi kundagi natijalari haqida axborotlar berildi. 

Uchrashuv davomida xorijiy mehmon tomonidan yuqori darajadagi mehmondo‘stlik, sportga bo‘lgan e’tibor va triatlonni rivojlantirish borasidagi sa’yi harakatlar uchun minnatdorchilik bildirildi. 

Shuningdek kelgusida o‘tkaziladigan nufuzli musobaqalarda o‘zbek sportchilarining munosib ishtiroki, qolaversa mamlakatimizda ham triatlonning nufuzli musobaqalarini o‘tkazish takliflari muhokama qilindi. 

Qayd etish lozimki, Samarqand shahri bir necha yillardan buyon triatlon bo‘yicha bir qator nufuzli sport musobaqalariga mezbonlik qildi va bu F.Arimani janoblari tomonidan ham alohida qayd etildi.

Xalqaro triatlon ittifoqi Prezidenti Fernandes Arimani yurtimizga tashrifi davomida Samarqand shahridagi triatlon va paratriatlon bo‘yicha jahon kubogi musobaqalari jarayonlarida ishtirok etib, qadimiy shahardagi bir nechta tarixiy obidalar bilan ham tanishdi.

Bundan tashqari, F.Arimani poytaxtimizning Yashnobod tumanida bunyod etilayotgan Olimpiya shaharchasidagi sport obyektlari, inshootlar va u yerda sportchi-murabbiylarga yaratilgan shart-sharoitlar bilan tanishtirildi.