Forum bolalar va onalarga tibbiy xizmat sifatini oshirish bo‘yicha xalqaro hamkorlikni muhokama qilish va mustahkamlash, umumiy ustuvor yo‘nalishlar hamda samarali strategiyalarni belgilash uchun muhim platforma vazifasini o‘tadi. Xususan, birlamchi tibbiy-sanitariya yordamini kuchaytirish va ko‘p tarmoqli yondashuv asosida bolalarga onkologik yordam ko‘rsatish masalalariga alohida e’tibor qaratildi.

Forumda YUNISEF, Jahon sog‘liqni saqlash tashkiloti (JSST), BMTning tegishli idoralari rahbarlari, Qozog‘iston, Qirg‘iziston, Tojikiston, Turkmaniston, O‘zbekiston va Ozarbayjon sog‘liqni saqlash vazirliklari hamda "Zamin" jamoat fondi vakillari ishtirok etdi.

Forum ishtirokchilariga murojaatida "Zamin" jamoat fondi vasiylik kengashi raisi Ziroat Mirziyoyeva quyidagilarni ta’kidladi:

"Biz har bir bolaning salomatligi va farovonligini ta’minlashga qaratilgan tizimli ishlarni izchil davom ettirishga qat’iy bel bog‘laganmiz. Ayniqsa, pediatriya xizmatlarida ko‘p tarmoqli yondashuvni joriy etish, shu jumladan onkologik kasalliklarga qarshi kurashish bo‘yicha dasturlar ishlab chiqishga alohida e’tibor qaratmoqdamiz. Bizning eng katta yutug‘imiz — baxtiyor bolalarning shodon kulgisi, ota-onalarning xotirjamligi va to‘la ishonchidir".

Mintaqaning klinik va ilmiy faoliyatiga ilg‘or xalqaro tajribani joriy etishni jadallashtirishga qaratilgan, Vasiylik kengashi tarkibiga a’zo mamlakatlar rahbarlari kirgan Bolalar saratoniga qarshi kurashish bo‘yicha xalqaro akademik xabning yagona platformasini yaratishga alohida e’tibor qaratildi.

Forumda Markaziy Osiyo mamlakatlari tomonidan YUNISEF va JSST ko‘magida bolalar va o‘smirlar salomatligi sohasida hukumatlar, akademik doiralar, hamkorlar va fuqarolik jamiyati o‘rtasidagi hamkorlikni kuchaytirishga qaratilgan deklaratsiya qabul qilindi.