Qashqadaryo viloyati hоkimligi

Qashqadaryo viloyati hokimi Murotjon Azimov rahbarligida o‘tkazilgan navbatdagi “hokimlik soati” yig‘ilishida davlat dasturlari ijrosini ta’minlash, jamiyatda barqarorlikni mustahkamlash hamda fuqarolar farovonligini yuksaltirishga qaratilgan qator muhim masalalar muhokama etildi.

Xususan, Prezidentimizning “2025-yilda Respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish bo‘yicha chora-tadbirlar to‘g‘risida”gi qarori ijrosi yuzasidan viloyatda amalga oshirilayotgan ishlar atroflicha tahlil qilindi. Kriminogen vaziyatni barqarorlashtirish, huquqni muhofaza qilish organlari faoliyatini kuchaytirish va profilaktika ishlarini yanada samarali tashkil etishga alohida e’tibor qaratildi.

Yig‘ilishda, shuningdek, yashil energetika siyosatini amalga oshirish, xususan, quyosh panellari o‘rnatilishini jadallashtirish borasidagi vazifalar ijrosi, "9-may – Xotira va qadrlash kuni"ga bag‘ishlangan tadbirlarga tayyorgarlik holati hamda safarbarlik chaqiruv rezervini shakllantirish masalalari keng muhokama qilindi.

Shu bilan birga, erta turmush va erta nikohning oldini olishga qaratilgan tadbirlar, mahallalar faoliyati, investitsiyaviy loyihalarni jadallashtirish, qishloq xo‘jaligi, qurilish, ijtimoiy soha va boshqa ustuvor tarmoqlarda amalga oshirilayotgan ishlar tahlil qilinib, mavjud kamchiliklarni bartaraf etish yuzasidan aniq vazifalar belgilandi.

Viloyat rahbari yig‘ilishda so‘z olgan har bir mas’ul rahbarlarga yo‘nalishlar bo‘yicha aniq topshiriqlar berib, ularni belgilangan muddatlarda, samarali va natijaga yo‘naltirilgan holda ijro etish zarurligini ta’kidladi.