Qashqadaryo viloyati hоkimligi

Mirishkor tumanining “Oqmachit” mahallasida viloyatda paxtachilik yo‘nalishida faoliyat yuritayotgan yetakchi klasterlardan biri — “Sulton Tex Group” korxonasi tomonidan umumiy qiymati 7 mln AQSH dollariga teng bo‘lgan zamonaviy tikuv-trikotaj fabrikasi qurilishiga rasmiy tarzda start berildi.

Prezidentimiz tomonidan tadbirkorlikni rivojlantirish, xususiy sektorni qo‘llab-quvvatlash, sanoatni mahalliylashtirish borasida amalga oshirilayotgan islohotlar natijasida tadbirkorlar uchun keng imkoniyatlar yaratilmoqda. Ana shunday imkoniyatlardan samarali foydalangan holda, “Sulton Tex Group” korxonasi tuman sanoat infratuzilmasini mustahkamlash yo‘lida yirik loyihani amalga oshirmoqda.

Tadbirda tuman hokimi Fayzullo G‘ulomov ishtirok etib, tuman sanoat salohiyatini oshirish, yangi ish o‘rinlari yaratish yo‘lida tashabbus ko‘rsatgan korxona rahbari Nurbek Ergashevga minnatdorlik bildirib, unga an’anaviy tarzda to‘n kiydirdi.

Marosim davomida mahalla nuroniylari tomonidan duo o‘qilib, dasturxon yozildi va osh tortildi — bu ezgu ishga fayz va baraka tilashning timsoli bo‘ldi.

Loyiha doirasida qurilish maydonining aniq chegaralari belgilab olinib, yerga qoziqlar qoqildi. Korxonaning to‘liq ishga tushishi natijasida 500 ta doimiy ish o‘rni yaratiladi. Bu esa nafaqat “Oqmachit” mahallasi, balki butun tuman aholisining bandligini ta’minlashda muhim omil bo‘ladi.