Oliy Majlis Qonunchilik palatasining Mehnat, sog‘liqni saqlash va ijtimoiy masalalar qo‘mitasida aholini arzon va sifatli dori vositalari bilan ta’minlash masalasi muhokama qilindi

Dori vositalari bozorida ochiqlik va shaffoflikni ta’minlash, narxlarni tartibga solish, milliy ishlab chiqaruvchilarni rag‘batlantirish, davlat xaridlarida ochiqlik va raqobat muhitini shakllantirish muhim hisoblanadi.

“Aholini arzon va sifatli dori vositalari bilan ta’minlash davr talabi” mavzuida o‘tkazilgan davra suhbatida Oliy Majlis Qonunchilik palatasining Mehnat, sog‘liqni saqlash va ijtimoiy masalalar qo‘mitasi, “Adolat” SDP fraksiyasi hamda Raqobatni rivojlantirish va iste’molchilar huquqlarini himoya qilish qo‘mitasi mas’ul xodimlari tomonidan mamlakatimizda aholi va tibbiyot muassasalarini arzon dori vositalari, tibbiyot buyumlari va tibbiy texnika bilan ta’minlash tizimini takomillashtirish hamda tarmoqni rivojlantirish maqsadida qabul qilinayotgan normativ-huquqiy hujjatlar va ularning ijrosi, sohada erishilayotgan yutuqlar qatorida yuzaga kelayotgan muammolar va ularni bartaraf etish masalalari atroflicha muhokama qilindi.

Raqobat qo‘mitasi boshqarma boshlig‘i o‘rinbosari B.Sharipov tomonidan “Aholini sifatli, arzon va xavfsiz dori vositalari bilan ta’minlashda qo‘mita tomonidan amalga oshirilgan ishlar va istiqboldagi rejalar” mavzuida qilingan taqdimotda dori-vositalariga belgilangan savdo ustamalariga rioya etilishini nazorat qilishni raqamlashtirish, “FAIR TECH” tizimiga ma’lumotlarning kelib tushish tartibi, dorilar narxlarini oshirish uchun qo‘llaniladigan jarimalar va bu borada Qo‘mita tomonidan amalga oshirilgan ishlar haqida ma’lumot berib o‘tildi. Shuningdek, o‘z yechimini kutayotgan muammolarni bartaraf etish, sohani yana-da rivojlantirish hamda takomillashtirish bo‘yicha bir qator takliflar berilib, kelgusida ularni samarali amalga oshirish yuzasidan aniq rejalar ishlab chiqildi.

Ma’lumot uchun: Qo‘mitaning “Fair tech” yagona axborot tizimi orqali kelib tushgan xabarlar bo‘yicha tekshirish o‘tkazilganda dorixonada 13,7 mlrd so‘m miqdorida asossiz daromad olinganligi aniqlanib, 1545 ta dorixonalarga belgilangan tartibda ish qo‘zg‘atilib chora ko‘rilgan.