O‘zbekiston Respublikasi Maktabgacha va maktab taʼlimi vazirligi

Maʼlumki, Maktabgacha va maktab taʼlimi vazirligi tomonidan 2019-yildan boshlab maktabgacha taʼlim tashkilotlari pedagoglari oʻrtasida “Yilning eng yaxshi tarbiyachisi” kasbiy koʻrik-tanlovi oʻtkazilib kelinmoqda.

Tanlovning joriy yilgi sinovlari mart-aprel oylarida tashkil etildi. Sinovlarning tuman (shahar) bosqichida ishtirok etish uchun davlat maktabgacha taʼlim tashkilotlarining 16 384 nafar direktor oʻrinbosarlari va tarbiyachilari roʻyxatdan oʻtdi (2024-yilga nisbatan 44,7 foizga oshgan).

Tanlov quyidagi nominatsiyalar boʻyicha oʻtkazilmoqda:

- ”Eng yaxshi metodist”;

- “Yilning eng fidokor tarbiyachisi”;

- “Eng yaxshi ijodkor-ixtirochi tarbiyachi”;

- “Innovatsion va axborot texnologiyalarini qoʻllaydigan eng yaxshi tarbiyachi”;

- “Eng yaxshi eko-targʻibotchi tarbiyachi”;

- “Yangi Oʻzbekistonda yangi avlod bolalarini maʼnaviy kamolotga yetaklovchi eng yaxshi tarbiyachi”.

Tanlovning tuman (shahar) saralash bosqichida ishtirokchilar 3 ta shart boʻyicha bilim va malakalarini sinovdan oʻtkazishdi. Yakuniy natijalarga koʻra, 1 055 nafar ishtirokchi tanlovning hududiy saralash bosqichida ishtirok etish yoʻllanmasini qoʻlga kiritdi.

7-17-aprel kunlari oʻtkazilgan tanlovning hududiy bosqich yakuniy natijalarga koʻra, 79 nafar ishtirokchi tanlovning Respublika final bosqichida ishtirok etish yoʻllanmasini qoʻlga kiritdi.

24-25-aprel kunlari Maktabgacha va maktab taʼlimi vazirligi huzuridagi Abdulla Avloniy nomidagi pedagogik mahorat milliy institutida tanlovning Respublika final bosqichi oʻtkaziladi.

Birinchi shartda ishtirokchilar:

— maktabgacha taʼlim sifatini oshirishda (taʼlim mazmuni, taʼlimda metodikani qoʻllash, taʼlimga innovatsiyalarni joriy etish, taʼlim sifatining natijaviyligi va h.k) mavjud muammolar va ularning yechimlari yuzasidan aniq yangi takliflar toʻgʻrisida loyiha taqdimotini oʻtkazadi va u 30 ballik mezon asosida baholanadi.

Ikkinchi shartda — tegishli nominatsiyalar boʻyicha tanlangan mavzu yuzasidan mashgʻulot ishlanmasi tayyorlanadi va unga 60 daqiqa vaqt beriladi. U 40 ballik mezon asosida baholandi.

Uchinchi shartda — ishtirokchilarga metodika va maktabgacha taʼlim sohasi boʻyicha 30 tadan test savollari, har bir savol uchun 2 (ikki) daqiqa vaqt beriladi.

Test savollarining har bir toʻgʻri javobi 1,5 (bir yarim) ball bilan baholanadi va umumiy 30 ballni tashkil etadi. Test sinovlari onlayn tartibda oʻtkazildi.

Tanlovni Respublika final bosqichi gʻoliblari bir martalik pul mukofoti hamda qimmatbaho sovgʻalar bilan taqdirlanadi.

Shuningdek, oliy maʼlumotga ega boʻlmagan gʻoliblar oliy taʼlim muassasalarining “Maktabgacha taʼlim” yoʻnalishiga kirish imtihonlarisiz davlat granti asosida oʻqishga kirish imtiyozini qoʻlga kiritadi.