Joriy yilning mart-aprel oylarida maktabgacha ta’lim tashkilotlari pedagoglari o‘rtasida “Yilning eng yaxshi tarbiyachisi” kasbiy ko‘rik-tanlovining taqdirlash marosimi bo‘lib o‘tdi.
Sinovlarda davlat maktabgacha ta’lim tashkilotlarining 16 384 nafar direktor o‘rinbosari va tarbiyachilari quyidagi nominatsiyalar bo‘yicha o‘tkazildi:
-  ”Eng yaxshi metodist”;
-  “Yilning eng fidokor tarbiyachisi”;
-  “Eng yaxshi ijodkor-ixtirochi tarbiyachi”;
-  “Innovasion va axborot texnologiyalarini qo‘llaydigan eng yaxshi tarbiyachi”;
-  “Eng yaxshi eko-targ‘ibotchi tarbiyachi”;
-  “Yangi O‘zbekistonda yangi avlod bolalarini ma’naviy kamolotga yetaklovchi eng yaxshi tarbiyachi”.
Tanlovning Respublika final bosqichi joriy yilning 24-25 aprel kunlari Maktabgacha va maktab ta’limi vazirligi huzuridagi Abdulla Avloniy nomidagi pedagogik mahorat milliy institutida o‘tkazildi.
Birinchi shartda ishtirokchilar:
— maktabgacha ta’lim sifatini oshirishda (ta’lim mazmuni, ta’limda metodikani qo‘llash, ta’limga innovatsiyalarni joriy etish, ta’lim sifatining natijaviyligi va h.k) mavjud muammolar va ularning yechimlari yuzasidan aniq yangi takliflar to‘g‘risida loyiha taqdimotini o‘tkazdi va u 30 ballik mezon asosida baholandi.
Ikkinchi shartda — tegishli nominatsiyalar bo‘yicha tanlangan mavzu yuzasidan mashg‘ulot ishlanmasi tayyorlandi va unga 60 daqiqa vaqt berildi (40 ballik mezon asosida baholandi).
Uchinchi shartda — ishtirokchilarga metodika va maktabgacha ta’lim sohasi bo‘yicha 20 tadan test savollari, har bir savol uchun 2 (ikki) daqiqa vaqt berildi.
Test savollarining har bir to‘g‘ri javobi 1,5 (bir yarim) ball bilan baholandi va umumiy 30 ballni tashkil etdi. Test sinovlari onlayn tartibda o‘tkazildi.
Tadbirda tanlovning Respublika final bosqichi g‘oliblari bir martalik pul mukofoti hamda qimmatbaho sovg‘alar bilan taqdirlandi.
Ma’lumot uchun: oliy ma’lumotga ega bo‘lmagan g‘oliblar oliy ta’lim muassasalarining «Maktabgacha ta’lim» yo‘nalishiga kirish imtihonlarisiz davlat granti asosida o‘qishga kirish imtiyozini qo‘lga kiritadi.