Соңғы жылларда избе-из артып атырған инвестициялық тартымлылық себепли пайтахтымызда қурылыс пәти жеделлеспекте. Көп қабатлы турақ жайлар, мийманханалар, бизнес орайлары, мәденият ҳәм спорт комплекслери қала имканиятларын  кеңейтпекте. Жаңа Ташкент қурылысы да басланып,  екеўи заманагөй мегаполиске айланбақта.

Узақ жыллар хызмет ететуғын бундай жумысларда, әлбетте, сапа оғада әҳмийетли, 13-май күн усы мәселе бойынша мәжилис өткерилген еди. Мәмлекетимиз басшысы  қурылыста  сапа ҳәм қәўипсизлик биринши орында екенин атап өтип, бул бағдарларды илимий раўажландырыў, тараўға заманагөй процесслерди енгизиў бойынша көрсетпелер берген еди.

Бүгинги презентацияда усы бағдарда орынланған жумыслар ҳаққында мәлимлеме берилди. Тапсырмаға бола, жаңа жойбарластырылған көп қабатлы имаратлардың  қәўипсизлик талапларына сәйкес екенлиги қайта үйренип шығылған. «ӨзГАШКЛИТИ», Илимлер академиясы Сейсмология институты, айрықша жағдайлар басқармасы, санитария-эпидемиология сыяқлы 10ға шамалас  шөлкемниң  илимий-техникалық жуўмақлары алынған. Жаңа талапқа бола, көп қабатлы имаратлардың жер силкиниўге шыдамлылығы 9 баллдан кем болмайды.  Ҳәр бир усындай жойбар бойынша топланған жуўмақлар шығарылады.

Бийик объектлер, жаңа комплекслер көбейген сайын оларға турақлы электр энергиясы да зәрүр. Сонлықтан Чиланзар районында 160 мегаваттлы жаңа  подстанция қурылысы режелестирилген. Бул арқалы усы аймақтағы болажақ жойбарлар ушын қосымша қуўатлылық пайда болады, ҳәзирги тармақларға жүклеме түспейди.

Сондай-ақ бул районда 20 мың метр куб  сыйымға ийе суў резервуары қурылысы мөлшерленген. Нәтийжеде Шайхантахур, Чиланзар ҳәм Үчтепа районларында ишимлик суўы тәмийнаты үзликсизлиги тәмийинленеди. Күнине дерлик 8 мың киловатт саат электр үнемленеди.

Ташкент қаласы көплеген исбилерменлик илажларды, форум ҳәм көргизбелерди өткермекте. Усындай орынлардан  бири Central Asian Expo Uzbekistan – CАEх комплекси. Халықаралық әнжуманлар шеңберинде  түрли ушырасыўлар да өткерилиўин инабатқа алып, бул жерде сөйлесиў залларының қурылысы нәзерде тутылған.

Қала  тартымлығының және бир әҳмийетли факторы – қолайлы жәмийетлик транспорт. Пайиахтымызда ҳәм автобус, ҳәм метрополитен бағдарлары  избе- из кеңейтилип  барылмақта.

Алдын хабар берилгендей, метрополитенди Ташкент трактор заводы кварталына шекем алып барыў режелестирилген. Оны 2 басқышта әмелге асырыў нәзерде тутылмақта. Биринши басқышта Чиланзар жолының Пушкин бәндиргисинен Ташкент айланба жолына шекем жер бетинде метро жолы қурылады. Екинши басқышта ол жерден Ташкент трактор заводы кварталының үлкен бәндиргисине шекем жер асты жолы қурылады.

Сондай-ақ,  транспортлардың  ҳәрекетине колайлылық жаратыў мақсетинде усы темир жолды Ташкент айланба жолы астынан өткериў нәзерде тутылмақта. Жер асты бағдары да көшедеги ҳәрекетти тоқтатпаған ҳалда қурылады. Бул жаңа метро жолы 85 мың жолаўшыны қамтып алыўы күтилмекте.

Бул тараўдағы және бир перспективалы жойбар – Жаңа Ташкент қаласына метро жолы есапланады. Ол ҳәзирги «Дослық» метро бәндиргисинен басланып, жаңа орайға шекем  болады. Узынлығы 21 километр, 9 бәндиргиден ибарат болыўы күтилип атырған бул метро күнине 230 мыңға шекем жолаўшыларды қамтып ала алады.

Презентацияда усы жойбарлардың техникалық-экономикалық тәреплери көрип шығылды. Мәмлекетимиз басшысы қурылыстың сапасын ҳәм мәдениятын арттырыў, адамларға қолайлы шараятлар жаратыў бойынша көрсетпелер берди.