Соңғы күнлерде Жақын Шығыста жүз берген әскерий ҳәрекетлер онысызда тынышсыз жағдайды және де кескинлестирди. Бул Өзбекстанның дүнья базарларына шығыў жолларына ҳәм сыртқы саўда қатнасықларына унамсыз тәсир етпей қалмайды.

Сол себепли жағдайды дурыс баҳалап, сыртқы саўда, инвестиция, транспорт тараўларында жедел илажлар көриў шәрт екенлиги атап өтилди.

Атап айтқанда, экспорт жөнелислерин диверсификациялаў, жүклерди басқа қәўипсиз портларға көшириў зәрүр. Бул болса, дәслепки есап-санақларға бола, тасыў қәрежетиниң 30 процентке шекем артыўына себеп болыўы мүмкин. Сол себепли бирге ислесиўши мәмлекетлер менен альтернатив жолларды келисиў, экспортшы кәрханаларды қоллап-қуўатлаў бойынша тапсырмалар берилди.

Транспорт министрлиги, Инвестициялар ҳәм сыртқы саўда министрлиги, Саўда санаат палатасы ҳәм басқа тийисли уйымлардың басшыларына исбилерменлик субъектлери менен тығыз ислесип, транспорт-импорт әмелиятларына жәрдемлесиў, өнимлерине қосымша базарлар табыў ўазыйпасы қойылды. Соның менен бирге, өндиристи избе-из даўам еттириў, ишки базарда баҳаның турақлылығын тәмийинлеў керек екенлиги атап өтилди.