Бухоро вилояти ҳокимлиги

Яратиб берилаётган шарт-шароитдан унумли фойданган ҳолда ўз тадбиркорлик фаолиятини бошлаган Матлуба Ҳалимова ҳам Шайхон маҳалласи, 5-массивида истиқомат қилади. Ўтган йиллари ижтимоий муҳофазага олинган бу аёл маҳалла фаоллари кўмаги билан ҳеч қандай тўловларсиз, ҳудудда бўш турган бинолардан бирига жойлаштирилган. 

Тикувчиликка лаёқати бўлган бу аёл шаҳар ҳокимининг маҳалладаги ёрдамчиси тавсияномаси асосида тижорат банкидан 33 миллион сўм имтиёзли кредит маблағини олиб, ўзига берилган жойда тикувчилик фаолиятини йўлга қўйишга эришди. 
Имкониятдан самарали фойдаланаётгани туфайли бугунга келиб Матлуба Ҳалимова қўли остидаги чеварлар сонини 5 нафарга етказди. Улар қўл кучи билан ҳозирда кичик корхонага айланган цехда аёллар кийим-кечаги билан бирга меҳнат жамоалари учун махсус коржомалар тикиб тайёрланмоқда. Даромад чўғи эса кунлик тикиб тайёрланаётган буюртма ҳажмига боғлиқ.   

Ўзи учун очилган имконият эшикларидан оқилона фойдаланаётган яна бир шайхонлик чевар аёл Зарнигор Қиличева бўлиб, у ҳам маҳалла масъуллари кўмагида тижорат банки томонидан ажратилган имтиёзли кредит маблағи, 33 миллион сўмни замонавий тикув машинаси харидига сарфлаб, ўз хонадонида иш бошлади.  

"Ҳунарли киши хор бўлмас" деганларидек, тадбиркор аёл барча турдаги тикув матоларини тайёр ҳолга келтириб, мўмай даромадга эга бўлмоқда. Кўрпа, кўрпача, ёстиқлар, келинчаклар сепи учун сўзана, даврихона, каштадўзи ва дастурхонлар бежирим тикиб тайёрланмоқда. 
    
Шу билан бирга, Зарнигор Қиличева маҳалладаги хотин-қизларга тикувчилик сирларини ўргатиб, хайрли иш ортидан 4 нафар ишсиз аёлнинг бандлигини таъминлашга ҳам эришмоқда. Буюртма асосида тикилаётган маҳсулотлар эса аллақачон мижозларини топган. Кундалик ишини ривожлантириб келаётгани ортидан тикувчи аёл банк кредит сармоясини ҳам эмин-эркин бартараф қилмоқда. Эндиликда Зарнигор Қиличева фаолиятини янада кенгайтириш ҳаракатига тушган.  

Вилоят ҳокимлиги матбуот хизмати