Вобкент: ғўза парваришида “балиқ сирти” тарзидаги культиватор ишлови ҳосил нобудгарчилигига “қалқон”
2025-06-21 13:40:00 / Янгиликлар
Масалан, айни мавсумда ҳудуддаги "Garden Buxoro Agroklaster" МЧЖ томонидан “Қўнғирот” ҳудудида 350 гектар майдонда Хитойнинг "Чжун Тай-2" навли чигити экилган ва баравж ўсаётган ғўза ниҳоллари парваришланмоқда. Мутахассисларнинг фикрича, мазкур навдан ўтган йилда ҳар гектардан 65 центнер ҳосил олинган. Эътиборлиси, бу нав экилган майдонларда томчилатиб суғориш технологияси жорий қилинган. Бу ҳам ресурс сарфини тежашга хизмат қилади. Қолаверса, Хитой тажрибаси асосида парваришланаётган пахта майдонларида агротехник тадбирлар маҳаллий навга нисбатан икки баравар кам талаб этилади.
Айни пайтда туман хўжаликларидаги мавжуд 232 та культиватор агрегати билан бир кунда 556 гектардан зиёд ер майдонидаги ғўза ниҳоллари қатор орасига ишлов берилмоқда. Бу дегани, 9 минг 70 гектар ер майдонидаги ғўзадан мўл ва сифатли ҳосил етиштириш тақдири бугунги агротехник тадбирлар, культивация ишлови, “шарбат”лаб суғориш каби муҳим юмушларга боғлиқ.
Об-ҳаво ҳароратининг юқори кунларидан унумли фойдаланиб, ғўза қатор ораларига ишлов беришнинг аҳамияти катта. Шу кунларда мавжуд техникалар ва культиваторлар билан ғўза қатор ораларига 3 марта ишлов берилган бўлса, бу агротехник тадбир изчил давом эттирилиб, ўсиш, ривожланишдан ортда қолаётган контурларга эътибор қаратилмоқда. Соҳада агроинспекциянинг туман бўлими инспекторлари томонидан эса культиваторлар ишчи органларини “балиқ сирти” тарзида қайта жиҳозлашга доир мониторинг-таҳлил ишлари юритилмоқда.
Мутахассислар фикрича, культиваторлар ишчи органлари “балиқ сирти2 тарзида қайта жиҳозлангани ғўза ҳосилини 20 фоизгача нобудгарчиликдан ҳимоя қилади. Ривожланишнинг шоналаш, гуллаш фазасидаги ниҳолларга ишлов беришда бу усул жуда қўл келади.
Ўрни келганда, айтиш жоизки, ғўза парваришида агротехник тадбирларни ўз вақтида амалга оширмаган, культиваторларни жиҳозламаган қишлоқ хўжалиги корхоналари масъул мутасаддилари Ўзбекистон Республикасининг Маъмурий жавобгарлик тўғрисидаги Кодексининг тегишли моддаларига мувофиқ, жавобгарликка тортилишлари юзасидан огоҳлантирилмоқда.
Вилоят ҳокимлиги матбуот хизмати