Ўзбекистон Республикаси Ички ишлар вазирлиги

2025 йилнинг 22–25 май кунлари Россия Федерациясининг Москва шаҳрида хизмат вазифаларини бажариш вақтида ҳалок бўлган ходимлар хотирасига бағишланган XIX халқаро турнир бўлиб ўтди. Турнирда армия ва полиция ходимлари ўртасида дзюдо спорти бўйича эркаклар жамоавий мусобақаси ташкил этилди.

Ушбу нуфузли турнирда Ўзбекистон, Озарбайжон, Арманистон, Беларусь, Тожикистон, Қозоғистон, Қирғизистон давлатлари, шунингдек Россиянинг ички ишлар, фавқулодда вазиятлар, Росгвардия, Жазони ижро этиш, Қўриқлаш федерал хизматлари ва Мудофаа вазирлиги жамоалари иштирок этишди. Умумий ҳисобда 15 жамоадан 200 нафарга яқин спортчилар ғолиблик учун кураш олиб бордилар.

Ўзбекистон Республикаси Ички ишлар вазирлиги мусобақада икки жамоа билан иштирок этди. Вазирликнинг биринчи терма жамоаси юқори натижаларни намойиш этиб, турнир якуни бўйича шарафли 2-ўринни қўлга киритди. Биринчи ўрин Россия Федерацияси Мудофаа вазирлиги жамоасига насиб этди. Учинчи ўрин эса Росгвардия ҳамда Қозоғистон Республикаси Ички ишлар вазирлиги жамоаларига берилди.

Иккинчи ўринни қўлга киритган Ўзбекистон Ички ишлар вазирлиги терма жамоаси таркибидаги спортчилар қуйидаги натижаларни кўрсатдилар:

• 66 кг вазн тоифасида: Фармонов Ахроржон Ахтам ўғли – Навоий вилояти ИИБ ТВБСО катта мутахассиси, катта сержант;

• 73 кг вазн тоифасида: Инаятов Бахром Бахадирович – Тошкент шаҳар ИИББ ТВБСО гуруҳ командири, катта лейтенант;

• 81 кг вазн тоифасида: Абдуллаев Умиджон Сайфиддинович – Бухоро вилояти ИИБ ТВБСО катта мутахассиси, кичик сержант;

• 90 кг вазн тоифасида: Бобоев Ғиёсжон Бекмуродович – Тошкент шаҳар ИИББ ТВБСО катта мутахассиси, кичик сержант;

• +90 кг вазн тоифасида: Чориев Дилшод Қобилмухаммадович – ИИВ Академияси Жисмоний тайёргарлик кафедраси ўқитувчиси, катта лейтенант.

Жамоанинг мураббийи сифатида ИИВ махсус операцияларни мувофиқлаштириш бошқармаси бошлиғи, полковник Саидкарим Алимов, шунингдек терма жамоа вакили сифатида Жисмоний ва жанговар тайёргарликни ташкил этиш бошқармаси бошлиғи, подполковник Умрбек Ражабов иштирок этдилар.

Халқаро турнир якунида ғолиблар махсус диплом ва медаллар билан тақдирландилар. Ўзбекистон делегацияси аъзолари 25 май куни Тошкент халқаро аэропортида тантанали равишда кутиб олинди.

Мазкур халқаро мусобақа 2007 йилдан буён мунтазам равишда ўтказиб келинмоқда. Бу каби спорт мусобақалари ички ишлар органлари ходимларининг жисмоний тайёргарлигини мустаҳкамлаш билан бир қаторда, халқаро ҳамкорликни ривожлантиришга ҳам хизмат қилади.