Ўзбекистон Республикаси Ички ишлар вазирлиги

Ватанни севиш, уни кўз қорачиғидек асраш – аждодлар ва келажак авлод олдидаги муқаддас бурч. Бугун юртимизда мана шу бурчга содиқ ўғил-қизлар, Янги Ўзбекистоннинг ватанпарвар ёшлари камол топмоқда.

Ички ишлар вазирлиги Академияси битирувчилари ёш лейтенантларга тантанали равишда диплом топшириш маросими бўлиб ўтди.

Тадбирда Ўзбекистон Республикаси Ички ишлар вазири, соҳавий хизматлар ва Академия раҳбарияти, ҳуқуқни муҳофаза қилувчи органларнинг масъуллари, қатор давлат органларидан меҳмонлар, соҳа фахрийлари, битирувчиларнинг ота-оналари, кенг жамоатчилик вакиллари ҳамда оммавий ахборот воситалари иштирок этдилар.

Бу йил Академиянинг кундузги таълим йўналишини “тезкор-қидирув фаолияти”, “тергов фаолияти”, “ҳуқуқбузарликлар профилактикаси фаолияти”, “эксперт-криминалистика фаолияти”, “хизмат фаолиятини психологик таъминлаш”, “ахборот хавфсизлиги”, “ташкилий штаб фаолияти” ҳамда “жазони ижро этиш фаолияти” мутахассисликлари бўйича 696 нафар курсант тамомлади. Шулардан 19 нафари имтиёзли диплом билан яна икки нафари муддатидан олдин “катта лейтенант” махсус унвони билан якунлашга муяссар бўлди.

Ўтган уч йил мобайнида улар замонавий педагогик ёндашувлар, миллий ва хорижнинг илғор тажрибалари асосида билим олиб, касбий кўникмаларини мустаҳкамлаб бордилар. Машғулотлар Академия профессор-ўқитувчилари, ички ишлар органларининг тажрибали амалиёт ходимлари, шунингдек турдош олий таълим муассасаларининг малакали мутахассислари томонидан олиб борилди. Курсантлар учун ўқув жараёни давомида ҳудудий ички ишлар органларида иш ўрганиш амалиётлари ташкил этилди.

Шунингдек, дуал таълим тизими жорий қилиниб, курсантларга назарий билимини амалиётда қўллаш имконияти яратилди. Ўқув дастурлари бўйича улар Якуний давлат аттестация имтиҳонларини топшириб, малакавий диплом ишларини муваффақиятли ҳимоя қилдилар.

Яна бир муҳим жиҳати, 119 нафар курсант Хитой ва Беларусь давлатларининг нуфузли таълим муассасаларида ташкил этилган ўқув курслари қатнашиб, хорижнинг илғор тажрибаларини ўрганди.

Сўнгги 5 йилда ички ишлар органларининг олтин фондини ташкил қилувчи аълочи ва намунали курсантлардан 18 нафари ички ишлар вазири, 8 нафари “Жалолиддин Мангуберди”, 6 нафари “Чўлпон” стипендияларига, 30 нафари “Академия аълочиси” кўкрак нишони, 38 нафари миллий ва халқаро танловларда юқори ўринларга сазовор бўлди.

Шу билан бирга, Академия курсантлари Жаҳон ва Осиё чемпионатларида 16 та, халқаро турнирларда 21 та, республика чемпионатларида 129 та, турдош олий таълим муассасалари ўртасидаги мусобақаларда 139 та медални қўлга киритдилар.

Хусусан, Сабина Камолова, Тофиқбек Акрамов, Анвар Ҳасанов, Дилбар Сафаровалар ички ишлар вазири стипендиясига, Камрон Исмоилов “Жалолиддин Мунгуберди” номидаги стипендияга, Фарангиз Абдураҳмонова “Чўлпон” стипендиясига сазовор бўлган бўлса, Муяссар Кушмуратова аёллар кураши, Азизбек Ҳошимов кикбоксинг, Асадбек Муродов қўл жанги, Ирода Бекмирзаева енгил атлетика бўйича республика ҳамда халқаро нуфузли мусобақаларда бир неча бор ғолиб ва совриндорлар қаторидан ўрин олди.

Эътирофлиси, муддатидан олдин “катта лейтенант” унвонига сазовор бўлган Тошмурод Абдураҳмонов “Инсон ҳуқуқлари ва эркинликлари соҳасида таълим ва инновациялар” ҳамда “Умуммиллий Конституция имтиҳони” миллий танловлари, “Ёшлар ва қонун” кўрик-танловининг республика босқичи, турдош олий таълим муассасалари ўртасида ўтказилган “Мардлар беллашуви” кўрик-танлови ғолиби, МДҲнинг турдош олий таълим муассасалари ўртасида ўтказилган илмий танловда 1-ўрин соҳиби ҳамда Олий таълим, фан ва инновациялар вазирлиги ҳузуридаги Ёшлар академияси аъзосидир.

Катта лейтенант Сабина Камолова ўз навбатида Ички ишлар вазири стипендияси ва “Таълим ифтихори” кўкрак нишони соҳибаси, турдош олий таълим муассасалари ўртасида ўтказилган “Конституция билимдони” кўрик-танлови ва “Ёш ташаббускор – 2023” танловининг республика босқичи ғолиби, шунингдек турдош олий таълим муассасалари ўртасида ўтказилган “Энг яхши китобхон” кўрик-танловида 1-ўрин соҳибаси ҳисобланади.

Тадбирда битирувчиларга юзланган Ички ишлар вазири генерал-майор Азиз Тошпулатов – хизматда ҳар қандай мураккаб шароитда қасамёдларига содиқ қолишларини, хизмат вазифаларига ҳалол, виждонан ёндашиб, бурчларини юксак масъулият билан адо этишларини, инсон ҳуқуқларига қатъий риоя қилган ҳолда фуқаролар ҳуқуқлари, эркинликлари ва қонуний манфаатларини ҳар қандай тажовузлардан ҳимоя қилишларини, шунингдек мунтазам ўз устиларида ишлаб, касбий билим ва кўникмаларни юксалтириб бориш ва халқпарвар ички ишлар органи ходими деган шарафли номга муносиб бўлиш ҳақида уқтириб ўтди.

Тантанали тадбирда сўзга чиққанлар томонидан ёшларнинг бугуни ва келажак тақдири йўлида яратилаётган улкан имкониятлар, фидойи ва ташаббускор ёшлар қўлга киритаётган ютуқлари эътироф этилиб, жамиятда қонун устуворлигини таъминлаш ва жиноятчиликка қарши курашишда Ватанимиз ва халқимизга юксак садоқат билан хизмат қилиш зарурлиги таъкидланди.