Электробуслар паркини жорий этиш ва эксплуатация қилишда самарадорликни ошириш мавзусида халқаро семинар ташкил этилди
2025-06-05 17:00:00 / Янгиликлар
Тошкент ва Наманган шаҳарларида бўлиб ўтган семинарларда электробус сотиб олишни режалаштирган тадбиркорлик субъектлари, манфаатдор вазирлик ва идоралар, маҳаллий ҳокимлик органлари вакиллари ҳамда халқаро консультантлар иштирок этдилар.
Шунингдек, семинарда мамлакатимизда электр транспорт воситалари инфратузилмасини жорий этишда энг йирик ташкилотлар бўлган “Megawatt Motors” ҳамда энг катта қувватлантириш тармоғига эга бўлган “TokBor” компанияси вакиллари иштирок этиб, ўз тақдимотларида соҳадаги долзарб масалаларга эътибор қаратишди.
Семинардан кўзланган асосий мақсад электробус сотиб олишга салоҳияти етарли бўлган хусусий инвесторларга техник кўмак кўрсатиш, Тошкент шаҳрида электробусларни харид қилиш ва эксплуатацияси бўйича тўпланган тажрибаларни маҳаллий ҳокимликлар, тегишли ташкилотлар вакиллари эътиборига етказиш ҳамда электробуслардан фойдаланишни оммалаштиришдан иборат.
Наманган шаҳрида ташкил этилган семинар доирасида Наманган шаҳар ҳокими Анваржон Отаходжаев билан учрашув ўтказилди. Учрашувда яшил шаҳар транспорт йўлакларини ташкил этиш ва электробусларни жорий этиш масалалари муҳокама қилинди.
Бўлиб ўтган учрашувда Наманган шаҳри бўйича электромобилликни ривожлантириш концепциясини грант лойиҳаси доирасида ишлаб чиқилишига келишиб олинди.
Электробуслар паркини кенгайтиришга кўмаклашишга қаратилган мазкур семинарнинг навбатдагиси Самарқанд шаҳрида жорий йилнинг 17 июнь куни бўлиб ўтиши режалаштирилган.