Ўзбекистон Республикаси Сув хўжалиги вазири Шавкат Хамраев ОТБ миссияси билан учрашув ўтказди. 

Учрашувда Қашқадарё вилоятидаги “Аёқчисой” ва Сурхондарё вилоятидаги “Обизаранг” сел-сув омборларини қуриш” лойиҳаси, “Оролбўйи ҳавзасида сув ресурсларини иқлим ўзгаришига мос ҳолда бошқариш” лойиҳаси, “Аму-Бухоро ирригация тизимини қайта тиклаш” лойиҳаси билан боғлиқ жараёнлар муҳокама қилинди. 

“Аёқчисой” сел-сув омборини қуриш орқали Яккабоғ, Чироқчи, Қамаши, Шаҳрисабз ва Китоб туманларидаги 25 минг гектар суғориладиган ерлар сув билан кафолатли таъминланади. “Обизаранг” сел-сув омбори эса Сариосиё ва Узун туманларидаги 10 минг гектар ерларнинг сув таъминотини яхшилайди. ОТБ молиялаштираётган ушбу лойиҳанинг умумий қиймати 60 млн АҚШ долларига тенг. 

“Оролбўйи ҳавзасида сув ресурсларини иқлим ўзгаришига мос ҳолда бошқариш” лойиҳаси биринчи босқичда Бухоро ва Сурхондарё вилоятларида, иккинчи босқичда Қорақалпоғистон Республикаси ва Хоразм вилоятларида амалга оширилади. Биринчи босқичда “Жондор” ва “Боботоғ” каналларининг реконструкция қилиниши натижасида қарийб 63 минг гектар, жумладан, Бухоро вилоятида 44,1 минг гектар, Сурхондарё вилоятида 18,6 минг гектар майдоннинг сув таъминоти яхшиланади. Лойиҳанинг умумий қиймати 194,9 млн АҚШ долларига тенг, шундан 150 млн доллари ОТБ қарз маблағи, 40,2 млн доллар Ўзбекистон Республикасининг улуши. 

“Аму-Бухоро ирригация тизимини қайта тиклаш” лойиҳасининг умумий қиймати 389,76 млн АҚШ долларига тенг. Шундан 200,75 млн АҚШ доллари ОТБнинг кредит қиймати, 108,97 млн АҚШ доллари Япоония халқаро ҳамкорлик агентлиги (JICA)нинг кредит қиймати, 80,04 млн АҚШ доллари Ўзбекистон Республикасининг улушини ташкил этади. Лойиҳа Бухоро вилоятининг барча туманлари ҳамда Навоий вилоятининг Кармана ва Қизилтепа туманларида амалга оширилади. 

Учрашувда ушбу лойиҳалар доирасида бажарилаётган ишлар таҳлил қилинди. Томонлар 3 та лойиҳа бўйича ишларни жадаллаштиришга келишиб олдилар.