Андижон вилоятидан оқиб ўтувчи Жанубий Фарғона магистрал каналининг ПК-194+60 пикетида дамбанинг сув ювиб кетиш ҳолати юзасидан Ўзбекистон Республикаси Сув хўжалиги вазирлигининг расмий баёноти
2025-05-08 12:50:00 / Янгиликлар
Вазирлик топшириғига кўра, вазиятни ўрганиш ва заруратга кўра тегишли тадбирларни амалга ошириш учун “Норин-Қорадарё” ирригация тизимлари ҳавза бошқармаси бошлиғи И.Тоиров, “Сувхўжаликназорат” инспекцияси раҳбари Р.Раҳимов, инспекциянинг Андижон вилоят бошқармаси бошлиғи М.Султонов, Фарғона магистрал каналлардан фойдаланиш бошқармаси бошлиғи Ш.Абдусаматов ҳамда тегишли идораларнинг вакилларидан иборат таркибда ишчи гуруҳи тузилган ва улар зудлик билан воқеа жойига етиб борган.
Мазкур объект Андижон, Фарғона вилоятлари ва қўшни Қирғиз Республикаси ҳудудларидаги ижтимоий объектлар ва қишлоқ хўжалиги экин майдонларини сув билан таъминлашга хизмат қилади.
Электр энергияси ишлаб чиқаришни йўлга қўйиш учун каналнинг ПК-194+60 пикетида “Гидропроект” МЧЖ лойиҳаси асосида “Гидроқурилиш буюртмачи хизмати” МЧЖ буюртмаси билан ГЭС қуриш ишлари олиб борилмоқда.
Ишчи гуруҳининг аниқлашича, ПК-194+60 пикетда каналнинг лойиҳавий сув ўтказиш қобилияти 80 м3/сек. бўлиб, ҳолат юзага келган вақтда каналдан 60 м3/сек сув ўтиб турган.
Фавқулодда вазиятни бартараф этиш учун Андижон сув омборидан сув чиқиши тўхтатилди. Ҳозирда каналда 30 м3/сек сув қолган бўлиб, соат 14:00 гача тўлиқ тўхтатилади.
Каналдаги ўтган сув Қуйи Жанубий Фарғона каналига йўналтирилмоқда. Ҳозирда аҳоли хонадонларига сув оқишини камайтириш чоралари кўрилмоқда.
Каналнинг дамбасини тиклаш бўйича штаб ташкил этилиб, раҳбар ходимлардан иборат доимий навбатчилик йўлга қўйилди. Фавқулодда вазиятни бартараф этиш учун 10 та самосвал, 4 та кара, 2 та бульдозер, 8 та экскаватор ва 50 дан ортиқ ишчи-ходимлар жалб қилинди.
Сув хўжалиги вазирлиги Ахборот хизмати