Raqamli texnologiyalar vazirligida “XXI asr bolalari” birinchi xalqaro bolalar teatr va IT festivali bo‘lib o‘tdi
2024-04-27 22:25:00 / Vazirlik yangiliklari
Oʻzbekiston Prezidenti Shavkat Mirziyoyevning Oʻzbekiston ijodkor ziyolilari vakillari bilan 2017-yil 30-avgust kuni Toshkent shahrida boʻlib oʻtgan videoselektor yigʻilishida “Mamlakatimizda milliy madaniyat, adabiyot va sanʼatni rivojlantirish bilan bogʻliq dolzarb masalalar, ularni hal etish yoʻllari, bu borada ijodiy uyushmalar va davlat tashkilotlari oldida turgan muhim vazifalar” yuzasidan berilgan topshiriqlari doirasida yetakchi tashkilotlar bilan maʼlum bir madaniyat va sanʼat muassasalari oʻrtasida “Doʻstlik klubi” tashkil etilgan edi.
Oʻzbekiston davlat yosh tomoshabinlar teatri “Doʻstlik klubi” aʼzosi Raqamli texnologiyalar vazirligi bilan oʻzaro hamkorlikda joriy yilda zamonaviy kompyuter texnologiyalariga bagʻishlangan yangi uslubdagi “Game over” spektakli sahnalashtirilib, premyerasi oʻtkazilgan edi.
Ushbu hamkorlik ishlarini davom ettirish maqsadida yosh ijrochilar o‘rtasida xalqaro hamkorlikni rivojlantirish, yoshlarning teatr va ITga bo‘lgan qiziqishlarini oshirish maqsadida kuni kecha Raqamli texnologiyalar vazirligida teatr va IT xalqaro festivali tashkil etildi.
Xalqaro tadbirda ishtirok etish uchun Belarus Respublikasi, Ozarbayjon, Qalmog‘iston Respublikasi, Gruziya, Kipr kabi davlatlaridan 55 dan ziyod aktyor xamda rejissyorlar tashrif buyurdi. Festival doirasida ushbu davlatlarning teatr ijodkorlari tomonidan sahnalashtirilgan spektakllar namoyishlari, aktyor-rejissyorlarning innovatsion va qiziqarli chiqishlari, mahorat-darslari bo‘lib o‘tdi.
Festival san’at va IT sohasida yirik va ahamiyatli voqea bo‘lib, raqamli texnologiyalar sohasida ijodiy g‘oyalarni rivojlantirish, madaniyatlarning o‘zaro ta’siri va mamlakatlar o‘rtasidagi do‘stlikni mustahkamlashga va yosh iste’dodlar o‘rtasida ijodkorlikni rivojlantirishga xizmat qildi.
Teatr tadbirlari O‘zbekiston Davlat yosh tomoshabinlar Teatri, O‘zbek milliy qo‘g‘irchoq teatri hamda IT Park binosida bo‘lib o‘tdi.