Meta kompaniyasi vakili bilan sun’iy intellekt va onlayn ta’lim bo‘yicha hamkorlik muhokama qilindi
2025-04-25 09:25:00 / Vazirlik yangiliklari
Uchrashuvda vazir birinchi o‘rinbosari O.Pekos mehmonlarni joriy yilning 23–26-sentabr kunlari bo‘lib o‘tadigan “ICTWeek – 2025” xalqaro tadbiriga taklif etdi.
Vazir o‘rinbosari R.Karimjonov mazkur tadbirning ahamiyati va ko‘lami haqida so‘z yuritib, Meta kompaniyasining mazkur haftalikda o‘z ko‘rgazma stendi, panel taqdimotlari, shuningdek, sun’iy inttellekt sohasidagi mutaxassislarini taklif qilgan holda faol ishtirok etishi mumkinligini ma’lum qildi.
Uchrashuvda, shuningdek, joriy yilning may oyida ishga tushirilishi rejalashtirilgan “1M AI Prompters” onlayn ta’lim platformasi haqida ma’lumot berdi. Ushbu platformada Meta o‘quv kurslarini joylashtirish taklifini bildirildi.
Shu bilan birga, O.Pekos “LLaMA” modelini elektron hukumat tizimlariga joriy etish bo‘yicha muvaffaqiyatli tajriba – Adliya vazirligi bilan amalga oshirilgan pilot loyiha haqida so‘zladi. Ushbu loyiha doirasida foydalanuvchilarga davlat xizmatlaridan foydalanish va rasmiy hujjatlar tayyorlashda yordam beradigan “LLaMA” asosidagi chat-bot taqdim etilgan.
Bundan tashqari, NVIDIA bilan hamkorlikda o‘tkaziladigan tadbir va unda O‘zbekistondagi ixtisoslashgan universitetlardan 300 nafar talabaning ishtirok etishi haqida ma’lumot berildi. Meta kompaniyasi bilan ham shunga o‘xshash tadbir tashkil etish taklif qilindi.
Meta vakili S.Abeyvardena o‘z nutqida sun’iy inttellektni o‘zbek tiliga moslashtirish va o‘qitish uchun mahalliy ma’lumotlar infratuzilmasini yaratish tashabbusini ilgari surdi. U Tayvan va Qozog‘istondagi muvaffaqiyatli loyihalarni misol sifatida keltirdi. Shuningdek, u Meta muhandislari bilan virtual sessiyalar tashkil etish, modellarni o‘rgatish, aniqlash, mutaxassislarni ochiq kodli dasturlar bilan ishlashga tayyorlash va “LLaMA”ni davlat veb-saytlariga integratsiya qilish bo‘yicha qo‘llab-quvvatlashga tayyor ekanligini ma’lum qildi.
Uchrashuvda tomonlar bir qator sohalarda hamkorlikni kengaytirish va chuqurlashtirishga tayyor ekanliklarini bildirdilar. Meta kompaniyasi O‘zbekistonda raqamli transformatsiya jarayoni va sun’iy inttellektni rivojlantirishga bo‘lgan intilishni yuqori baholadi.